கடந்த 40 நாட்களாக உலகையே அச்சுறுத்தி வந்த அமெரிக்கா - ஈரான் இடையிலான போர் மேகங்கள், தற்போது பாகிஸ்தான் தலைநகர் இஸ்லாமாபாத்தில் நிலைகொண்டுள்ளன. இரு தரப்புக்கும் இடையே கடந்த ஞாயிற்றுக்கிழமை நடைபெற்ற முதல்கட்டப் பேச்சுவார்த்தை தோல்வியில் முடிந்தாலும், இந்த வார இறுதிக்குள் மீண்டும் ஒரு 'அமர்வு' நடைபெற உள்ளதாக வெளியாகி இருக்கும் தகவல் புதிய நம்பிக்கையை ஏற்படுத்தியுள்ளது.

ஈரானின் அணுசக்தித் திட்டங்களுக்கு எதிர்ப்புத் தெரிவித்து, கடந்த பிப்ரவரி 28, 2026 அன்று அமெரிக்கா மற்றும் இஸ்ரேல் படைகள் இணைந்து ஈரானின் முக்கிய ராணுவத் தளங்கள் மீது தாக்குதலைத் தொடங்கின. சுமார் 40 நாட்கள் நீடித்த இந்த மோதலில் இரு தரப்பிலும் பெரும் சேதங்கள் ஏற்பட்டன.

சர்வதேச அழுத்தத்தின் காரணமாக, கடந்த ஏப்ரல் 8-ஆம் தேதி 14 நாள் 'தற்காலிகப் போர் நிறுத்தம்' அறிவிக்கப்பட்டது. இந்தப் போரை முற்றிலும் முடிவுக்குக் கொண்டு வர பாகிஸ்தான் பிரதமர் ஷேபாஸ் ஷெரீப் மற்றும் ராணுவ தளபதி ஆசிம் முனீர் ஆகியோர் தீவிர மத்தியஸ்த முயற்சியில் இறங்கினர்.

இஸ்லாமாபாத்தில் உள்ள செரீனா ஓட்டலில் கடந்த ஏப்ரல் 11 மற்றும் 12 ஆகிய தேதிகளில் வரலாற்றுச் சிறப்புமிக்க அமைதிப் பேச்சுவார்த்தை நடைபெற்றது. ஈரான் நாடாளுமன்ற சபாநாயகர் முகமது பாகர் காலிப் தலைமையில் வெளியுறவு மந்திரி சையது அப்பாஸ் அராக்சி உள்ளிட்ட உயர்நிலை அதிகாரிகள் பங்கேற்றனர்.

அமெரிக்கத் துணை ஜனாதிபதி ஜே.டி. வான்ஸ் தலைமையிலான குழுவினர் இதில் கலந்து கொண்டனர். சுமார் 21 மணிநேரம் நீடித்த இந்தப் பேச்சுவார்த்தையில், ஈரானின் அணுசக்தித் திட்டம் மற்றும் ஹார்மூஸ் ஜலசந்தி விவகாரத்தில் ஒருமித்த கருத்து ஏற்படவில்லை. இதனால், "ஒப்பந்தம் ஏதுமின்றித் திரும்புகிறோம்" எனக்கூறி ஜே.டி. வான்ஸ் கடந்த ஞாயிற்றுக்கிழமை அமெரிக்கா புறப்பட்டார்.

பேச்சுவார்த்தை தோல்வியடைந்ததைத் தொடர்ந்து, அமெரிக்க அதிபர் டொனால்ட் டிரம்ப் உத்தரவின் பேரில், அமெரிக்கக் கடற்படை ஹார்மூஸ் ஜலசந்தி பகுதியில் ஈரானியக் கப்பல்களைக் கட்டுப்படுத்தும் வகையில் கடற்படைத் தடையை  ஏப்ரல் 13-ஆம் தேதி முதல் அமல்படுத்தியுள்ளது. இதற்குப் பதிலடியாக, "எங்கள் எல்லைக்குள் நுழைந்தால் விளைவுகள் கடுமையாக இருக்கும்" என ஈரான் எச்சரித்துள்ளது.

இந்தச் சூழலில்தான், பாகிஸ்தானில் உள்ள ஈரான் தூதரக அதிகாரி ஒருவர் ஒரு முக்கியத் தகவலை வெளியிட்டுள்ளார். "முதலாவது சுற்றுப் பேச்சுவார்த்தை தோல்வியடைந்தாலும், பேச்சுவார்த்தைக்கான கதவுகள் இன்னும் மூடப்படவில்லை. இந்த வாரம் அல்லது அடுத்த வார தொடக்கத்தில் இஸ்லாமாபாத்திலேயே இரண்டாவது சுற்றுப் பேச்சுவார்த்தை நடைபெற அதிக வாய்ப்புகள் உள்ளன" என அவர் தெரிவித்துள்ளார்.

பாகிஸ்தான் தரப்பிலும், "அமைதி ஏற்படும் வரை எத்தனை சுற்றுப் பேச்சுவார்த்தைகளை வேண்டுமானாலும் முன்னின்று நடத்தத் தயாராக இருக்கிறோம்" என உறுதியளிக்கப்பட்டுள்ளது.