புதுப்பொலிவு பெற்ற வண்ணத்துப்பூச்சி பூங்கா இன்று திறப்பு!

சென்னையில் வண்டலூா் பூங்காவில் உள்ள புதுப்பிக்கப்பட்ட வண்ணத்துப்பூச்சி பூங்கா இன்று முதல் பார்வையாளர்களுக்காக அதிகாரப்பூர்வமாகத் திறக்கப்பட்டுள்ளது. கடந்த 2015-ஆம் ஆண்டு செப்டம்பர் 15-ஆம் தேதி மறைந்த முன்னாள் முதலமைச்சர் ஜெயலலிதாவால் தொடங்கி வைக்கப்பட்ட இந்த பூங்கா, நீண்ட நாட்களாகப் புனரமைப்புப் பணிகளுக்காக மூடப்பட்டிருந்தது. தற்போது அனைத்துப் பணிகளும் நிறைவடைந்து, பார்வையாளர்களைக் கவரும் வகையில் அதிநவீன வசதிகளுடன் இப்பூங்கா புத்துயிர் பெற்றுள்ளது.

பூங்காவின் மையப்பகுதியிலுள்ள உட்புற அரங்கம் கம்பளிப்பூச்சி வடிவில் கலைநயத்துடன் அமைக்கப்பட்டுள்ளது. இதன் மேல்பகுதி புதிய பாலிகார்பனேட் தாள்கள் மூலம் மாற்றப்பட்டு, வண்ண விளக்குகளால் அலங்கரிக்கப்பட்டுள்ளது. பார்வையாளர்கள் வண்ணத்துப்பூச்சிகளை பாதுகாப்பாக ரசிக்கும் வகையில் துருப்பிடிக்காத இரும்பு வலைகளும், புதிய மூங்கில் கைப்பிடிகளும் பொருத்தப்பட்டுள்ளன. மேலும், டிஜிட்டல் திரையில் பார்வையாளர்கள் தங்களுக்குப் பிடித்தமான மெய்நிகர் வண்ணத்துப்பூச்சிகளை வடிவமைக்கும் தொழில்நுட்ப வசதியும் இங்கு அறிமுகம் செய்யப்பட்டுள்ளது.

வண்ணத்துப்பூச்சிகளின் இனப்பெருக்கத்திற்கு ஏற்ற வகையில் 200-க்கும் மேற்பட்ட தாவர வகைகள் நடப்பட்டு, நீரூற்றுகளும் சீரமைக்கப்பட்டுள்ளன. பூங்கா நிர்வாகத்தின் புதிய முயற்சியாக, ஒவ்வொரு சனிக்கிழமையும் காலை 11:30 மணிக்கு வண்ணத்துப்பூச்சிகளைப் பறக்கவிடும் சிறப்பு நிகழ்ச்சி நடைபெறவுள்ளது. இதில் பொதுமக்களும் நேரடியாகப் பங்கேற்கலாம் என்று அறிவிக்கப்பட்டுள்ளதால், வார இறுதி நாட்களில் வண்டலூர் பூங்காவிற்கு வரும் சுற்றுலா பயணிகளுக்கு இது ஒரு சிறந்த அனுபவமாக இருக்கும்.