மேகதாது அணை விவகாரத்தில்   சட்ட நடவடிக்கை எடுக்க முதல்வர் விஜய் உடனடி  உத்தரவு!

காவிரி ஆற்றின் குறுக்கே மேகதாது அணையைக் கட்டுவதற்குப் பூமிபூஜை நடத்தக் கர்நாடக அரசு உத்தேசித்துள்ள சூழலில், தமிழ்நாட்டின் உரிமைகளை நிலைநாட்டவும், விவசாயிகளின் நலன்களைப் பாதுகாக்கவும் முதல்வர் ச.ஜோசப் விஜய் தலைமையில் இன்று தலைமைச் செயலகத்தில் அவசர ஆலோசனைக் கூட்டம் நடைபெற்றது. இந்த உயர் மட்டக் கூட்டத்தில் காவிரி நதிநீர் வல்லுநர்கள் மற்றும் சட்ட வல்லுநர்களுடன் விரிவான ஆலோசனைகள் மேற்கொள்ளப்பட்டன. உச்ச நீதிமன்றத் தீர்ப்பிற்கு எதிராகக் கர்நாடக அரசு மேற்கொள்ளும் இந்தத் திட்டத்தைத் தடுத்து நிறுத்தவும், தமிழ்நாட்டின் உரிமைகளை நிலைநாட்டவும் தொடர்ச்சியான சட்ட நடவடிக்கைகளை மிக விரைவாக மேற்கொள்ள அதிகாரிகளுக்கு முதல்வர் விஜய்   உத்தரவிட்டுள்ளார்.

உச்ச நீதிமன்றத்தில் ஏற்கனவே தமிழ்நாடு அரசால் கடந்த 2018 மற்றும் 2022 ஆகிய ஆண்டுகளில் மேகதாது அணைக்கு எதிராகத் தொடரப்பட்ட வழக்குகள் குறித்தும், அதன் தற்போதைய நிலை குறித்தும் இந்த ஆலோசனைக் கூட்டத்தில் மிக விரிவாக விவாதிக்கப்பட்டது. கடந்த 2025 நவம்பர் 13 அன்று உச்ச நீதிமன்றம் வழங்கிய தீர்ப்பினை எதிர்த்து தமிழ்நாடு அரசு தாக்கல் செய்த சீராய்வு மனு தள்ளுபடி செய்யப்பட்ட விவரங்கள் குறித்தும் விரிவாக எடுத்துரைக்கப்பட்டது. இந்தச் சூழ்நிலைகளைக் கருத்தில் கொண்டு, கர்நாடகாவின் அடுத்தகட்ட நகர்வுகளை முறியடிப்பதற்கான வலுவான புதிய சட்டப் போராட்டங்களை உடனடியாகத் தொடங்குவதற்குத் தேவையான அறிவுரைகளை முதல்வர் வழங்கியுள்ளார்.

இந்த முக்கியமான ஆலோசனைக் கூட்டத்தில் நீர்வளத்துறை அமைச்சர் என்.ஆனந்த், விளையாட்டு மேம்பாட்டுத்துறை அமைச்சர் ஆதவ் அர்ஜுனா, சட்டத்துறை அமைச்சர் சி.டி.ஆர்.நிர்மல்குமார் மற்றும் தலைமைச் செயலாளர் மு.சாய்குமார் உள்ளிட்ட பல முக்கிய அரசு உயர் அதிகாரிகள் கலந்து கொண்டனர். மேலும் அரசின் தலைமை வழக்கறிஞர் விஜய் நாராயண், நீர்வளத்துறை முதன்மைச் செயலாளர் சத்யபிரத சாகு மற்றும் காவிரி தொழில்நுட்பக் குழுமத் தலைவர் ஆர்.சுப்பிரமணியன் ஆகியோரும் கலந்து கொண்டு தங்களது சட்ட ஆலோசனைகளை வழங்கினர். தமிழக விவசாயிகளின் வாழ்வாதாரத்தைப் பாதிக்கும் இந்த மேகதாது அணை விவகாரத்தில் தமிழக அரசின் இந்த  நடவடிக்கை ஒட்டுமொத்த அரசியல் மற்றும் விவசாய வட்டாரங்களில் பெரும் பரபரப்பை ஏற்படுத்தியுள்ளது.