வாக்காளர்களுக்கு ஜாக்பாட்: நாளை அரசு பேருந்துகளில் இலவச பயணம்!

தமிழக சட்டமன்றத் தேர்தல் வாக்குப்பதிவு நாளை நடைபெற உள்ள நிலையில், வாக்காளர்களின் வசதிக்காக அரசு ஒரு முக்கிய அறிவிப்பை வெளியிட்டுள்ளது. இதன்படி, நாளை ஒரு நாள் மட்டும் மூத்த குடிமக்கள் மற்றும் மாற்றுத்திறனாளிகள் அரசுப் பேருந்துகளில் கட்டணமின்றி இலவசமாகப் பயணம் செய்யலாம் எனத் தெரிவிக்கப்பட்டுள்ளது. தேர்தல் நாளில் அனைவரும் தங்களின் ஜனநாயகக் கடமையை எவ்விதத் தடையுமின்றி ஆற்றுவதை உறுதி செய்யவே இந்த அதிரடி சலுகை வழங்கப்பட்டுள்ளது.

இந்தச் சலுகையின்படி, 60 வயதிற்கு மேற்பட்ட முதியவர்கள், பார்வை குறைபாடு உள்ளவர்கள் மற்றும் அனைத்து வகையான மாற்றுத்திறனாளிகளும் சாதாரண நகரப் பேருந்துகளில் இலவசமாகப் பயணிக்கலாம். வாக்குச் சாவடிகளுக்குச் சென்று வர ஏதுவாக இந்த வசதி செய்யப்பட்டுள்ளதால், வாக்காளர்கள் இதனைப் பயன்படுத்தி 100 சதவீத வாக்குப்பதிவை உறுதி செய்ய வேண்டும் என அறிவுறுத்தப்பட்டுள்ளது. நடத்துனர்களிடம் உரிய அடையாளச் சான்றுகளைக் காண்பித்து இந்த இலவசப் பயணச் சலுகையைப் பெற்றுக்கொள்ளலாம் எனப் போக்குவரத்துத் துறை தரப்பில் கூறப்பட்டுள்ளது.

தேர்தலை முன்னிட்டுப் பயணிகளின் வருகை அதிகமாக இருக்கும் என்பதால், தமிழகம் முழுவதும் சுமார் 3,570 சிறப்புப் பேருந்துகள் கூடுதலாக இயக்கப்பட உள்ளன. வழக்கமான பேருந்துகளுடன் சேர்த்து நாளை மொத்தம் 5,662 பேருந்துகள் மக்கள் பயன்பாட்டிற்காகச் சாலைகளில் வலம் வரும் எனத் தகவல்கள் தெரிவிக்கின்றன. குறிப்பாகச் சென்னை போன்ற மாநகரப் பகுதிகளில் போக்குவரத்து நெரிசலைக் குறைக்கவும், வாக்காளர்கள் விரைவாக வாக்குச்சாவடிக்குச் சென்று வரவும் சிறப்பு ஏற்பாடுகள் செய்யப்பட்டுள்ளன.