பகுஜன் சமாஜ் கட்சியின் முன்னாள் மாநிலத் தலைவர் ஆம்ஸ்ட்ராங் கொலைக்கு பழிவாங்கும் நோக்கில், ஜாமீனில் வெளிவந்துள்ள எதிர்த்தரப்பு ரவுடிகளைக் கொலை செய்யச் சதித் திட்டம் தீட்டியதாக, சென்னை போலீசாரின் 'ஏ-பிளஸ்' வரிசைப் பட்டியலிலுள்ள பிரபல ரவுடி 'ஒற்றைக்கண் ஜெயபால்' என்பவரை ரவுடிகள் ஒழிப்புத் தனிப்படை போலீசார் அரக்கோணத்தில் வைத்து அதிரடியாகக் கைது செய்துள்ளனர்.

ராணிப்பேட்டை மாவட்டம் அரக்கோணம் கே.பி. நகர் பகுதியைச் சேர்ந்தவர் ஜெயபால் என்ற ஒற்றைக்கண் ஜெயபால் (66). இவர் மீது கொலை, கொலை முயற்சி உள்ளிட்ட 13-க்கும் மேற்பட்ட குற்ற வழக்குகள் நிலுவையில் உள்ளன. குறிப்பாக, புளியந்தோப்பு ஆற்காடு சுரேஷ் கொலை வழக்கில் இவர் முக்கியக் குற்றவாளி ஆவார்.

கடந்த 2024-ஆம் ஆண்டு ஜூலை 5-ஆம் தேதி பெரம்பூரில் படுகொலை செய்யப்பட்ட பகுஜன் சமாஜ் கட்சித் தலைவர் ஆம்ஸ்ட்ராங்குடன் ஜெயபால் நெருங்கிய தொடர்பில் இருந்துள்ளார். அடுத்த மாதம் ஜூலை 5ம் தேதி ஆம்ஸ்ட்ராங்கின் இரண்டாம் ஆண்டு நினைவு நாள் அனுசரிக்கப்பட உள்ளது. இந்நிலையில் ஆம்ஸ்ட்ராங் கொலை வழக்கில் கைதாகிச் சிறையிலிருந்த எதிர்த்தரப்பைச் சேர்ந்த முக்கிய ரவுடிகள் பலர் தற்போது ஜாமீனில் வெளியே வந்துள்ளனர். இவர்களைத் தீர்த்துக்கட்டி, ஆம்ஸ்ட்ராங் கொலைக்குப் பழிதீர்க்க ஒற்றைக்கண் ஜெயபாலும் அவரது ஆட்களும் ஆயுதங்களுடன் சதித் திட்டம் தீட்டி வருவதாக உளவுத்துறை போலீசார் எச்சரிக்கை விடுத்தனர்.

உளவுத்துறையின் எச்சரிக்கையைத் தொடர்ந்து, ரவுடிகள் ஒழிப்புத் தனிப்படை போலீசார் ஜெயபாலை உன்னிப்பாகக் கண்காணித்து வந்தனர்.  சென்னை பேசின் பிரிட்ஜ் காவல் எல்லைக்குட்பட்ட பகுதியில் உள்ள சில முக்கிய ரவுடிகளுடன் ஜெயபால் தொடர்ந்து ரகசியத் தொடர்பில் இருப்பது சைபர் க்ரைம் போலீசாரின் அலைபேசி அழைப்பு ஆய்வில் உறுதியானது. இதையடுத்து, நேற்று அரக்கோணத்தில் மறைந்திருந்த ஜெயபாலைத் தனிப்படை போலீசார் நாற்புறமும் வளைத்து கைது செய்தனர். அவரிடமிருந்து 2 கிலோ கஞ்சா பொட்டலங்களும் பறிமுதல் செய்யப்பட்டன.

கைது செய்யப்பட்ட ஜெயபால் உடனடியாகச் சென்னை பேசின் பிரிட்ஜ் காவல் நிலையத்தில் ஒப்படைக்கப்பட்டார். அங்கு உயர் அதிகாரிகள் முன்னிலையில், ஆம்ஸ்ட்ராங் கொலை வழக்கில் ஜாமீனில் வந்தவர்களைக் கொலை செய்ய யாரிடமெல்லாம் உதவி கோரப்பட்டது, துப்பாக்கி உள்ளிட்ட ஆயுதங்கள் ஏதேனும் பதுக்கப்பட்டுள்ளதா என்ற கோணத்தில் விடிய விடிய விசாரணை நடத்தப்பட்டது.

இதனைத் தொடர்ந்து, கஞ்சா கடத்தல் தடுப்புச் சட்டத்தின் கீழ் வழக்குப் பதிவு செய்த பேசின் பிரிட்ஜ் போலீசார், ஜெயபாலை இன்று நீதிமன்றத்தில் ஆஜர்படுத்திப் பலத்த பாதுகாப்புடன் புழல் மத்தியச் சிறையில் அடைத்தனர். இந்த கைது நடவடிக்கை மூலம் சென்னையில் அரங்கேறவிருந்த ஒரு மிகப்பெரிய பழிவாங்கல் கொலைச் சதி முறியடிக்கப்பட்டுள்ளதாகக் காவல் துறை தரப்பில் தெரிவிக்கப்பட்டுள்ளது.