திண்டுக்கல் மாவட்டம், உலகப் புகழ்பெற்ற பழனி அருள்மிகு தண்டாயுதபாணி சுவாமி கோயிலில், பக்தர்களைத் தடையின்றி விரைந்து தரிசனத்திற்கு அழைத்துச் செல்வதாகக் கூறி ரூ.3,000 லஞ்சம் பெற்ற தனியார் பாதுகாப்புப் படை காவலாளி பணிநீக்கம் செய்யப்பட்டுள்ளார்.

பழனி முருகன் கோயிலுக்கு நாள்தோறும் பல்லாயிரக்கணக்கான உள்நாட்டு மற்றும் வெளிநாட்டுப் பக்தர்கள் வருகை தந்து சாமி தரிசனம் செய்து வருகின்றனர். விசேஷ நாட்கள் மற்றும் வார இறுதி நாட்களில் கூட்ட நெரிசலைப் பயன்படுத்திக் கொண்டு சில இடைத்தரகர்களும், ஊழியர்களும் பக்தர்களிடம் முறைகேடாகப் பணம் பறிப்பதாகத் தொடர்ந்து புகார்கள் வந்த வண்ணம் இருந்தன.

சம்பவத்தன்று பழனி மலைக்கோயிலுக்குச் சாமி தரிசனம் செய்ய வந்த பக்தர்கள் சிலரை, பொது வரிசையில் காத்திருக்க வைக்காமல் வி.ஐ.பி முறையில் விரைவாக அழைத்துச் செல்வதாகக் கூறி, அங்குப் பாதுகாப்புப் பணியில் ஈடுபட்டிருந்த முத்து என்ற காவலாளி ரூ. 3,000 பணத்தை லஞ்சமாகப் பெற்றுள்ளார். இதனால் ஏமாற்றமடைந்த பக்தர்கள், இச்சம்பவம் குறித்துக் கோயில் நிர்வாக அதிகாரிகளிடம் புகார் அளித்தனர்.

பக்தர்கள் அளித்த புகாரின் தீவிரத்தைக் கருத்தில் கொண்டு, பழனி கோயில் இணை ஆணையர் மாரிமுத்து உடனடியாக விசாரணையைத் தொடங்கினார்.

முதற்கட்ட நடவடிக்கையாக, சம்பந்தப்பட்ட மலைக்கோயில் பகுதியில் பொருத்தப்பட்டிருந்த கண்காணிப்பு கேமரா காட்சிகளை இணை ஆணையர் மாரிமுத்து நேரில் ஆய்வு செய்தார். அதில், காவலாளி முத்து பக்தர்களிடம் இரகசியமாகப் பேசி, பணத்தைப் பெற்றுக் கொள்வது அப்பட்டமாகத் தெரிந்தது. கண்காணிப்பு கேமரா ஆதாரத்தின் மூலம் காவலாளி முத்து லஞ்சம் பெற்றது 100% உறுதியானதைத் தொடர்ந்து, கோயில் நிர்வாகம் மற்றும் பாதுகாப்பு வழங்கும் தனியார் ஏஜென்சி மூலம் அவர் உடனடியாகப் பணிநீக்கம் செய்யப்பட்டார்.

கோயில் வளாகத்திற்குள் லஞ்சம் மற்றும் முறைகேடுகளில் ஈடுபடும் ஊழியர்கள் யாராக இருந்தாலும் அவர்கள் மீது கடுமையான துறை ரீதியான மற்றும் சட்ட ரீதியான நடவடிக்கைகள் எடுக்கப்படும் என்றும், பக்தர்கள் இது போன்ற முறைகேடுகள் நடந்தால் உடனடியாகத் தகவல் தெரிவிக்கலாம் என்றும் கோயில் இணை ஆணையர் மாரிமுத்து எச்சரித்துள்ளார்.