சட்டப்பேரவையில் முதலமைச்சர் விஜய் மிகத் திட்டவட்டமாகத் தெரிவித்துள்ளார். தவறு செய்தவர்கள் யாராக இருந்தாலும் அவர்கள் மீது கடுமையான சட்ட நடவடிக்கைகள் பாயும் என்பதைத் தனது உரையின் மூலம் அவர் உறுதிப்படுத்தியுள்ளார். ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதத்தில் பேசிய அவர், முந்தைய ஆட்சியாளர்களின் ஊழல் மற்றும் முறைகேடுகள் குறித்துக் கடுமையான எச்சரிக்கைகளை விடுத்தார்.

சட்டப்பேரவையில் இன்று ஆவேசமாக உரையாற்றிய முதலமைச்சர் விஜய், தற்போதைய அரசின் தூய்மையான நிர்வாகக் கொள்கை குறித்துப் பேசினார். "எங்களது அரசு சாமானிய மக்களுக்கான அரசு. மக்கள் வரிப்பணத்தின் ஒவ்வொரு பைசாவும் அவர்களது நலனுக்காக மட்டுமே பயன்படுத்தப்படும். கட்சி நிதி என்ற பெயரிலும், பல்வேறு திட்டங்களின் பெயரிலும் இதற்கு முன்பு இங்கே பெரிய அளவில் கொள்ளையடிக்கப்பட்டுள்ளது.

அவ்வாறு மக்கள் பணத்தைச் சுருட்டியவர்களிடம் இருந்து தற்போது ஊழல் பணம் அதிரடியாக மீட்கப்பட்டு வருகிறது. அந்தப் பணம் அனைத்தும் தற்பொழுது முறையாக அரசு கஜானாவில் சேர்க்கப்பட்டு வருகிறது" என்று அவர் பெருமிதத்துடன் குறிப்பிட்டார். தொடர்ந்து பேசிய அவர், அரசியல் காழ்ப்புணர்ச்சி இன்றி, ஆதாரங்களின் அடிப்படையிலேயே இந்த நடவடிக்கைகள் எடுக்கப்பட்டு வருவதாகக் கூறினார். மக்கள் நலனை மட்டுமே தாரக மந்திரமாகக் கொண்டு தவெக அரசு செயல்பட்டு வருவதாகவும், அதிகாரத்தைப் பயன்படுத்தி மக்கள் பணத்தைக் கையாடல் செய்தவர்கள் எவ்வளவு பெரிய செல்வாக்கு மிக்கவர்களாக இருந்தாலும், சட்டத்தின் பிடியில் இருந்து தப்பிக்க முடியாது என்றும் அவர் எச்சரித்தார்.

ஊழலுக்கு எதிரான தற்போதைய அரசின் இந்த கண்டிப்பான நிலைப்பாடு, தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.