பி.எம்.ஸ்ரீ திட்டம்... தமிழகம் மற்றும் மேற்கு வங்க அரசுகளுக்கு ஒன்றிய அரசு கடிதம்!

தமிழ்நாடு அரசுப் பள்ளிகளில் பி.எம்.ஸ்ரீ திட்டத்தைச் செயல்படுத்தும் வகையில், அதற்கான ஒப்பந்தத்தில் உடனடியாகக் கையெழுத்திடும்படி  தமிழ்நாடு மற்றும் மேற்கு வங்க மாநிலத் தலைமைச் செயலாளர்களுக்கு மத்திய கல்வி அமைச்சகம் கடிதம் அனுப்பியுள்ளது. நாடு முழுவதும் உள்ள அரசுப் பள்ளிகளைத் தரம் உயர்த்தும் நோக்கில் கொண்டு வரப்பட்ட இத்திட்டத்தில் இணையுமாறு இரு மாநிலங்களுக்கும் மீண்டும் வலியுறுத்தப்பட்டுள்ளது. மேற்கு வங்கத்தில் தற்போது பாஜக அரசு அமைய உள்ளதால், அங்கு இத்திட்டம் தடையின்றிச் செயல்படுத்தப்பட அதிக வாய்ப்புகள் உள்ளதாகக் கருதப்படுகிறது.

அதே நேரத்தில், தமிழ்நாட்டில் அமைய உள்ள புதிய அரசு இத்திட்டம் தொடர்பாக என்ன முடிவெடுக்கும் என்ற எதிர்பார்ப்பு அரசியல் வட்டாரத்தில் எழுந்துள்ளது. ஏற்கனவே இருந்த அரசு, இத்திட்டத்தின் சில அம்சங்கள் மாநில உரிமைகளைப் பாதிப்பதாகக் கூறி இதில் இணையாமல் இருந்து வந்தது. தற்போது தமிழக வெற்றிக் கழகம் தலைமையிலான புதிய அரசு அமைய உள்ள சூழலில், மாணவர்களின் நலன் கருதி மத்திய அரசின் இந்த நவீன கல்வித் திட்டத்தை ஏற்றுக் கொள்ளுமா என்பது இன்னும் சில நாட்களில் தெரிந்துவிடும்.

பி.எம்.ஸ்ரீ திட்டத்தின் கீழ் தேர்ந்தெடுக்கப்படும் பள்ளிகளுக்குக் கூடுதல் நிதி ஒதுக்கீடு செய்யப்பட்டு, அவை மாதிரிப் பள்ளிகளாக மாற்றப்படும் என்பது குறிப்பிடத்தக்கது. இதன் மூலம் அரசுப் பள்ளி மாணவர்களுக்குத் தரமான கல்வி மற்றும் நவீன வசதிகள் கிடைக்கப் பெறும் என ஒன்றிய அரசு தெரிவித்துள்ளது. தமிழகத்தின் புதிய முதலமைச்சராகப் பொறுப்பேற்க உள்ள விஜய், மத்திய அரசுடனான உறவு மற்றும் மாநிலக் கல்விக் கொள்கை ஆகியவற்றைக் கருத்தில் கொண்டு இந்த விவகாரத்தில் இறுதி முடிவை எடுப்பார் என எதிர்பார்க்கப்படுகிறது.