என் இறப்பிற்கு பின்னர், உடலை  மருத்துவக் கல்லூரிக்கு தானமாக எழுதி வைத்திருக்கிறேன் என்று பலர் சொல்லக் கேள்விப்பட்டிருப்போம். பல பிரபலங்களின் உடல்கள் இப்படி அவர்கள் மறைவுக்குப் பின்னர் மருத்துவ கல்லூரிக்கு வழங்கப்பட்டிருக்கிறது. அவர்கள் இறந்தும் வாழ்பவர்கள். இப்படி மருத்துவக் கல்லூரிகளுக்குத் தானமாக வழங்கப்படும் உடல்கள், வருங்கால மருத்துவர்களின் கல்வி மற்றும் ஆராய்ச்சிப் பணிகளுக்காகப் பயன்படுத்தப்படுகின்றன. இது ஒரு புனிதமான பணியாகக் கருதப்படுகிறது. 

உடல் தானமாகப் பெறப்பட்டவுடன், அது கெட்டுப்போகாமல் இருக்க ஃபார்மலின் உள்ளிட்ட வேதிப்பொருட்கள் ரத்த நாளங்கள் வழியாக உடலுக்குள் செலுத்தப்படும். இது உடலை நீண்ட காலத்திற்குப் பாதுகாக்கும்.

மருத்துவ முதலாமாண்டு படிக்கும் மாணவர்கள், மனித உடலின் பாகங்கள், நரம்புகள் மற்றும் ரத்த நாளங்கள் குறித்து நேரடியாகத் தெரிந்துகொள்ள இந்த உடல்கள் பயன்படுத்தப்படுகின்றன. ஒரு உடலை முழுமையாக ஆய்வு செய்து முடிக்கச் சுமார் ஒரு வருடம் வரை ஆகலாம். ஆய்வுப் பணிகள் அனைத்தும் நிறைவடைந்த பிறகு, அந்த உடல் எஞ்சிய பாகங்களுடன் மிக மரியாதையான முறையில் கையாளப்படும். ஆய்வு முடிந்த உடல்களை மருத்துவக் கல்லூரி நிர்வாகமே அரசு விதிகளின்படி தகனம் செய்யும் அல்லது அடக்கம் செய்யும். தானம் வழங்கியவர்களின் குடும்பத்தினர் விரும்பினால், ஆய்வு முடிந்த பிறகு உடலை அவர்களிடம் ஒப்படைக்கும் நடைமுறையும் சில இடங்களில் பின்பற்றப்படுகிறது. பல மருத்துவக் கல்லூரிகளில், உடலைத் தானம் செய்தவர்களுக்கு நன்றி செலுத்தும் விதமாக 'Silent Mentor' என்ற பெயரில் மாணவர்கள் அஞ்சலி செலுத்தும் நிகழ்வுகளும் நடத்தப்படுகின்றன.

உடல் தானம் செய்ய விரும்புபவர்கள், உயிருடன் இருக்கும் போதே அதற்கான படிவத்தைப் பூர்த்தி செய்து அருகிலுள்ள அரசு மருத்துவக் கல்லூரியில் சமர்ப்பிக்க வேண்டும். இயற்கை மரணம் அடைந்தவர்களின் உடல்கள் மட்டுமே தானமாக ஏற்றுக்கொள்ளப்படும்; தற்கொலை அல்லது விபத்து போன்ற மருத்துவ சட்ட வழக்குகளுக்கு உட்பட்ட உடல்கள் பொதுவாகத் தானமாகப் பெறப்படுவதில்லை. மருத்துவ உலகின் முன்னேற்றத்திற்காகத் தங்கள் உடலைத் தானம் செய்பவர்கள், இறந்த பிறகும் பல உயிர்களைக் காக்கும் மருத்துவர்களை உருவாக்குவதில் பெரும் பங்கு வகிக்கின்றனர்.