வாட்ஸ்அப்பில் இனி ரீசார்ஜ் செய்யலாம்...  அதிரடி வசதியை அறிமுகம் செய்தது மெட்டா!

உலக அளவில் கோடிக்கணக்கான மக்கள் பயன்படுத்தும் வாட்ஸ்அப் செயலி, இந்தியப் பயனர்களுக்காக ஒரு அதிரடிப் புதிய வசதியை இன்று அறிமுகம் செய்துள்ளது. இனி பயனர்கள் தங்கள் செல்போன் எண்களுக்கு ரீசார்ஜ் செய்ய மற்ற செயலிகளைத் தேடி அலைய வேண்டிய அவசியமில்லை, நேரடியாக வாட்ஸ்அப் மூலமாகவே இந்த வேலையைச் சுலபமாக முடித்துக் கொள்ளலாம். இதற்காக வாட்ஸ்அப் நிறுவனம் பே-யூ   என்ற நிறுவனத்துடன் கைகோர்த்துள்ளதுடன், முதற்கட்டமாக ஜியோ, ஏர்டெல் மற்றும் விஐ ஆகிய முன்னணி நிறுவனங்களின் வாடிக்கையாளர்கள் இந்தச் சேவையைப் பயன்படுத்த வழிவகை செய்யப்பட்டுள்ளது.

இந்த வசதியைப் பயன்படுத்த வாட்ஸ்அப் முகப்புத் திரையில் புதிதாக ஒரு ரூபாய்  சின்னம் கொடுக்கப்பட்டுள்ளது, அதன் மூலம் நேரடியாகப் பணம் செலுத்தும் பகுதிக்குச் சென்று ரீசார்ஜ் பணிகளை மேற்கொள்ளலாம். உங்களது மொபைல் எண் மற்றும் நெட்வொர்க் விவரங்களைத் தேர்வு செய்தவுடன் கிடைக்கும் பல்வேறு பிளான்களில் ஒன்றை விரல் நுனியில் செலக்ட் செய்து கொள்ளலாம். யூபிஐ (UPI), டெபிட் கார்டு அல்லது கிரெடிட் கார்டு என உங்களுக்கு விருப்பமான முறையில் பணத்தைச் செலுத்தி உடனடியாக ரீசார்ஜ் செய்து கொள்ளும் வகையில் இந்தத் தொழில்நுட்பம் மிக எளிமையாக வடிவமைக்கப்பட்டுள்ளது.

தேர்தல் பரபரப்புகளுக்கு மத்தியிலும் மக்களைக் கவரும் வகையில் கொண்டு வரப்பட்டுள்ள இந்த வசதி, வரும் வாரங்களில் அனைத்து ஆண்ட்ராய்டு மற்றும் ஐபோன் பயனர்களுக்கும் படிப்படியாகக் கிடைக்கும் எனத் தெரிவிக்கப்பட்டுள்ளது. ஏற்கனவே மின்சார பில் கட்டுவது மற்றும் மெட்ரோ ரயில் டிக்கெட் எடுப்பது போன்ற வசதிகள் வாட்ஸ்அப்பில் இருக்கும் நிலையில், தற்போது ரீசார்ஜ் வசதியும் சேர்ந்திருப்பது மக்களிடையே பெரும் வரவேற்பைப் பெற்றுள்ளது. இனி ஒரே செயலிக்குள் தகவல் பரிமாற்றம் முதல் பணப்பரிவர்த்தனை வரை அனைத்தையும் முடித்துக் கொள்ளலாம் என்பதால் தொழில்நுட்ப உலகில் இது ஒரு முக்கிய மைல்கல்லாகப் பார்க்கப்படுகிறது.