"வாக்குறுதி என்னானது? எத்தனை மதுக்கடைகள் மூடப்பட்டது?"  - விஜய்க்கு அன்புமணி ராமதாஸ் கேள்வி!

தமிழ்நாட்டில் பள்ளிகள், வழிபாட்டுத் தலங்கள் மற்றும் மக்கள் அதிகம் கூடும் இடங்களுக்கு அருகில் உள்ள 717 மதுக்கடைகளை உடனடியாக மூட முதலமைச்சர் விஜய் பிறப்பித்த உத்தரவு இன்னும் முழுமையாகச் செயல்படுத்தப்படவில்லை என்று பாமக தலைவர் அன்புமணி ராமதாஸ் கடுமையான குற்றச்சாட்டுகளை முன்வைத்துள்ளார்.

இது தொடர்பாக அவர் வெளியிட்டுள்ள அறிக்கையில், தமிழ்நாட்டில் தவெக அரசு பொறுப்பேற்றதைத் தொடர்ந்து, மக்கள் குடியிருப்புப் பகுதிகள் மற்றும் கல்வி நிறுவனங்களுக்கு அருகில் இருக்கும் 717 மதுக்கடைகளை மூடுவதற்கு முதலமைச்சர் விஜய் இரண்டு வாரக் காலக்கெடு விதித்து உத்தரவிட்டிருந்தார். முதலமைச்சர் விஜய் அறிவித்த அந்த இரண்டு வாரக் காலக்கெடு கடந்த மே 26-ஆம் தேதியுடன் முழுமையாக நிறைவடைந்துவிட்டது.

இதுகுறித்து அறிக்கை வெளியிட்டுள்ள அன்புமணி ராமதாஸ், "முதலமைச்சரின் உத்தரவுப்படி அந்த 717 மதுக்கடைகளும் இன்னும் முழுமையாக மூடப்படவில்லை. பல மாவட்டங்களில் இந்த மதுக்கடைகள் தற்போதும் தடையின்றிப் பள்ளிகள் மற்றும் வழிபாட்டுத் தலங்களின் அருகிலேயே செயல்பட்டு வருகின்றன" என்று சுட்டிக்காட்டியுள்ளார்.

மதுவிலக்கு விவகாரத்தில் அரசு வெறும் விளம்பர அரசியல் செய்யாமல், சொன்ன வாக்குறுதியை நிஜத்தில் செயல்படுத்த வேண்டும் என்று வலியுறுத்தியுள்ள பாமக தலைவர் அன்புமணி ராமதாஸ் சில முக்கிய கேள்விகளை எழுப்பியுள்ளார்.

"முதலமைச்சர் விஜய் விதித்த கெடு முடிந்துவிட்ட நிலையில், தமிழகத்தில் உண்மையில் எத்தனை மதுக்கடைகள் இதுவரை மூடப்பட்டுள்ளன? மூடப்பட்ட கடைகளின் அதிகாரப்பூர்வப் பட்டியலை அரசு உடனடியாக பொதுமக்களுக்கு வெளியிட வேண்டும்.

மக்களின் நலன் சார்ந்த இந்த விவகாரத்தில் அரசுத் துறைகளின் மெத்தனப் போக்கு கண்டிக்கத்தக்கது. இனியாவது அதிகாரிகள் துரிதமாகச் செயல்பட்டு, சொன்னபடி அனைத்துக் கடைகளையும் மூட நடவடிக்கை எடுக்க வேண்டும்."

தமிழகத்தில் பூரண மதுவிலக்கை முதன்மைக் கொள்கையாகக் கொண்டு பாமக தொடர்ந்து போராடி வரும் சூழலில், புதிய தவெக அரசின் மதுக்கடைகள் மூடல் உத்தரவு குறித்த அன்புமணியின் இந்தக் கேள்வி அரசியல் வட்டாரத்தில் விவாதத்தை ஏற்படுத்தியுள்ளது.