அனிருத் - காவ்யா திருமணத்தில் தனுஷ் பங்கேற்காதது ஏன்? சமூக வலைத்தளங்களில் சூடுபிடிக்கும் விவாதம்!
பிரபல இசையமைப்பாளர் அனிருத் மற்றும் காவ்யா ஆகியோரது திருமண வரவேற்பு நிகழ்ச்சி நேற்று சென்னையில் கோலாகலமாக நடைபெற்ற நிலையில், இந்த நிகழ்வில் நடிகரும் அனிருத்தின் உறவினருமான தனுஷ் கலந்து கொள்ளாதது திரையுலகிலும் சமூக வலைத்தளங்களிலும் பேசுபொருளாக மாறியுள்ளது. கிரீஸில் நடைபெற்ற திருமணத்தில் தனுஷின் மகன்கள் பங்கேற்றிருந்த போதிலும், சென்னை வரவேற்பில் தனுஷ் இல்லாதது குறித்து ரசிகர்களும் நெட்டிசன்களும் பல்வேறு கேள்விகளை எழுப்பி வருகின்றனர்.
இசையமைப்பாளர் அனிருத் மற்றும் காவ்யா ஆகியோரது திருமணம் கடந்த நவம்பர் 11-ஆம் தேதி கிரீஸில் நடைபெற்றது. இதில் நெருங்கிய உறவினர்கள் மற்றும் நண்பர்கள் பங்கேற்ற நிலையில், தனுஷின் மகன்களும் கலந்து கொண்டதாகத் தகவல்கள் தெரிவிக்கின்றன. இதனைத் தொடர்ந்து சென்னையில் நடைபெற்ற திருமண வரவேற்பு நிகழ்வில் திரையுலகப் பிரபலங்கள் மற்றும் முக்கிய விருந்தினர்கள் கலந்து கொண்டனர். ஆனால், அனிருத்தை இசையமைப்பாளராகத் திரையுலகிற்கு அறிமுகம் செய்த தனுஷ் இந்த வரவேற்பில் பங்கேற்காதது கவனத்தை ஈர்த்துள்ளது.
தனுஷின் முன்னாள் மனைவியான ஐஸ்வர்யா ரஜினிகாந்த் இயக்கி, தனுஷ் நடித்த ‘3’ திரைப்படத்தின் மூலமே அனிருத் இசையமைப்பாளராக அறிமுகமானார். அந்தப் படத்தில் இடம்பெற்ற ‘ஒய் திஸ் கொலவெறி’ பாடல் ஒரே நாளில் உலகளவில் பெரும் வரவேற்பைப் பெற்று அனிருத்திற்குப் பெரிய திருப்புமுனையை ஏற்படுத்தியது.
திரையுலகில் நுழைந்து 15 ஆண்டுகள் நிறைவடைந்ததையொட்டி இரண்டு நாட்களுக்கு முன்பு அனிருத் வெளியிட்ட பதிவில், தனுஷ் குறித்து எந்தக் குறிப்பையும் இடம்பெறச் செய்யவில்லை என்பதும் தற்போது இணையத்தில் சுட்டிக்காட்டப்பட்டு வருகிறது.
அனிருத்தின் திருமணம் மற்றும் திருமண வரவேற்பிற்குத் தனுஷுக்கு அழைப்பு விடுக்கப்பட்டதா, அல்லது அழைப்பு இருந்தும் தவிர்த்தாரா என்பது குறித்துப் பல்வேறு யூகங்களும் கருத்துகளும் சமூக வலைத்தளங்களில் பகிரப்பட்டு வருகின்றன. இதற்கிடையில், தனது 56-வது திரைப்படத்தின் படப்பிடிப்பிற்காக நடிகர் தனுஷ் மதுரைக்குப் பயணம் மேற்கொண்டுள்ளார். மதுரை விமான நிலையத்தில் வந்திறங்கிய அவரை ரசிகர்கள் பூங்கொத்து வழங்கி உற்சாகமாக வரவேற்றனர்.
அனிருத் - காவ்யா திருமண வரவேற்பு நிகழ்வு குறித்தும், தனுஷ் படப்பிடிப்பிற்காக மதுரை சென்றிருப்பது குறித்தும் சினிமா வட்டாரங்களில் தொடர்ந்து பேசப்பட்டு வருகிறது. இரு தரப்பினரும் இது குறித்து எந்த அதிகாரப்பூர்வ விளக்கமும் அளிக்காத நிலையில், சமூக வலைத்தளங்களில் விவாதங்கள் நீடித்து வருகின்றன.