பாஜக மூத்த தலைவர் எச். ராஜாவுக்குத் தேர்தல் முடிந்த பிறகு ஆளுநர் பதவி வழங்கப்படலாம் என்று பரவி வரும் தகவல்கள், தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளன.

தமிழக பாஜகவின் மிக மூத்த தலைவர்களில் ஒருவரான எச். ராஜா, கடந்த சில மாதங்களாக உடல்நலக் குறைவு காரணமாகத் தீவிர அரசியலில் இருந்து சற்று ஒதுங்கியிருந்தார். இந்நிலையில், அவர் விரைவில் ஒரு மாநிலத்தின் ஆளுநராக நியமிக்கப்பட வாய்ப்புள்ளதாகத் தகவல்கள் வெளியாகியுள்ளன.

கடந்த ஜனவரி 30ம் தேதி சென்னையில் நடைபெற்ற நிகழ்ச்சி ஒன்றில் எச். ராஜா திடீரென மயங்கி விழுந்தார். அவருக்கு மூளை முடக்குவாதம் ஏற்பட்டதாகக் கண்டறியப்பட்டு, அப்பல்லோ மருத்துவமனையில் சுமார் மூன்று வாரங்கள் சிகிச்சை பெற்றார். அந்தச் சமயத்தில் முதல்வர் ஸ்டாலின், துணை முதல்வர் உதயநிதி மற்றும் இபிஎஸ் உள்ளிட்ட பல தலைவர்கள் நேரில் சென்று நலம் விசாரித்தனர்.

சமீபத்தில் தமிழகத்திற்குத் தேர்தல் பிரசாரத்திற்காக வந்த பிரதமர் நரேந்திர மோடி, எச். ராஜாவை நேரில் சந்தித்துப் பேசினார். எச். ராஜா யாரிடமும் பிடிமானம் இல்லாமல் சுயமாக நடந்து வந்து பிரதமரைச் சந்தித்தது அவரது உடல்நலம் தேறி வருவதைக் காட்டியது. இந்தச் சந்திப்பின் போது, எச். ராஜாவின் நீண்ட காலக் கட்சிப் பணியைப் பாராட்டிய பிரதமர், "தேர்தல் முடிந்ததும் உங்களுக்கு ஒரு நல்ல செய்தி வரும்" என்று கூறியதாகத் தகவல்கள் கசிகின்றன.

பாஜகவில் மூத்த தலைவர்களுக்கு (75 வயதைக் கடந்தவர்கள் அல்லது தீவிர அரசியலில் இருந்து ஓய்வு பெறுபவர்கள்) ஆளுநர் பதவி வழங்கி கௌரவிப்பது வழக்கமான ஒன்று. தமிழகத்தைச் சேர்ந்த இல. கணேசன், சி.பி. ராதாகிருஷ்ணன் ஆகியோர் ஏற்கனவே ஆளுநர்களாக நியமிக்கப்பட்டுள்ளனர்.

நான்கு தசாப்தங்களுக்கும் மேலாகப் பாஜகவின் தூணாக விளங்கும் எச். ராஜாவுக்கு, அவரது உழைப்பிற்கு அங்கீகாரமாக வடமாநிலம் ஒன்றின் ஆளுநர் பொறுப்பு வழங்கப்படலாம் என டெல்லி வட்டாரங்கள் தெரிவிக்கின்றன.

எச். ராஜா தற்போது ஓய்வில் இருந்தாலும், பாஜக - அதிமுக கூட்டணியின் ஒருங்கிணைப்புக் குழுப் பணிகளில் அவ்வப்போது ஆலோசனைகளை வழங்கி வருகிறார். சட்டமன்றத் தேர்தல் முடிவுகள் வெளியாகும் மே 4-ஆம் தேதிக்குப் பிறகு, மத்திய அமைச்சரவை மாற்றப்படும் போது இதற்கான அதிகாரப்பூர்வ அறிவிப்பு வெளியாகலாம் என எதிர்பார்க்கப்படுகிறது.