தகவல் தொழில்நுட்பத் துறை தற்போது செயற்கை நுண்ணறிவு எனப்படும் ஏஐ தொழில்நுட்பத்தின் அசுர வளர்ச்சியால் மிகப்பெரிய மாற்றத்தைச் சந்தித்து வருகிறது. பல நாட்கள் தேவைப்படும் சாப்ட்வேர் கோடிங் பணிகளை ஏஐ தொழில்நுட்பம் சில நிமிடங்களிலேயே முடித்து விடுவதால், இந்தத் துறையில் பணியாற்றும் ஏராளமானோர் வேலை இழக்கும் அபாயத்தைச் சந்தித்து வருகின்றனர்.

கடந்த ஆண்டில் மட்டும் உலகம் முழுவதும் சுமார் 3 லட்சம் பேர் ஐடி துறையில் வேலை இழந்த நிலையில், நடப்பு ஆண்டில் இதுவரை சுமார் 85,000 பேர் தங்கள் வேலையைப் பறிகொடுத்துள்ளனர். இந்த வேலை இழப்புகள் ஐடி ஊழியர்களிடையே பெரும் கவலையை ஏற்படுத்தியுள்ள போதிலும், மற்றொரு புறம் புதிய வேலைவாய்ப்புகளுக்கான கதவுகளும் திறக்கப்பட்டுள்ளன.

ஏஐ தொழில்நுட்பத்தின் வருகையால் பாரம்பரிய வேலைகள் குறைந்தாலும், அந்தத் தொழில்நுட்பத்தை இயக்கவும் நிர்வகிக்கவும் தெரிந்தவர்களுக்கு மிகப்பெரிய தேவை ஏற்பட்டுள்ளது. தொழில்நுட்ப மாற்றத்திற்கு ஏற்பத் தங்களைத் தயார்படுத்திக் கொள்ளும் ஊழியர்களுக்கு முன்னுரிமை அளிக்கப்படும் என்பதால், ஊழியர்கள் புதிய திறன்களைக் கற்றுக்கொள்வது காலத்தின் கட்டாயமாக மாறியுள்ளது.

இது குறித்து நாஸ்காம் கூட்டமைப்பு வெளியிட்டுள்ள சமீபத்திய அறிக்கையில், ஏஐ தொழில்நுட்பத்தில் நிபுணத்துவம் பெற்ற சுமார் 10 லட்சம் பேருக்கு விரைவில் புதிய வேலைவாய்ப்புகள் கிடைக்கும் என நம்பிக்கை தெரிவிக்கப்பட்டுள்ளது.

வரும் 2026-ம் ஆண்டிற்குள் இந்திய ஐடி துறையில் ஏஐ சார்ந்த பணிகளின் தேவை பல மடங்கு அதிகரிக்கும் என்பதால், இளைஞர்கள் இதற்கேற்பத் தங்களைத் தகுதிப்படுத்திக் கொள்ள வேண்டும். வேலை இழப்பு ஒருபுறம் இருந்தாலும், வளர்ந்து வரும் நவீனத் தொழில்நுட்பங்களைக் கற்றுக்கொள்வதன் மூலம் ஐடி துறையில் பிரகாசமான எதிர்காலத்தை உறுதி செய்ய முடியும்.