வேலூரில் இன்று செய்தியாளர்களைச் சந்தித்த திமுக பொதுச்செயலாளரும், முன்னாள் அமைச்சருமான துரைமுருகன், தவெக அரசின் நிதிக் கொள்கைகள் மற்றும் மாநிலத்தின் சட்டம்-ஒழுங்கு நிலை குறித்துக் கடுமையான விமர்சனங்களை முன்வைத்துள்ளார்.  தமிழகத்தின் கடன் சுமை அதிகரித்ததற்கு முந்தைய திமுக அரசுதான் காரணம் எனத் தற்போதைய தவெக அரசின் நிதி அமைச்சர் வெளியிட்ட வெள்ளை அறிக்கைக்குப் பதிலடி கொடுக்கும் விதமாக இவருடைய பேட்டி அமைந்துள்ளது.

புதிதாகப் பொறுப்பேற்றுள்ள தவெகவின் ஆட்சி முழு காலத்திற்கும் நீடிக்குமா என்று செய்தியாளர்கள் எழுப்பிய கேள்விக்குத் துரைமுருகன் தனது பாணியில் சுருக்கமாகப் பதிலளித்தார். "ஒரு ஆட்சி நீடிக்குமா இல்லையா என்பது முற்றிலும் தற்பொழுது ஆட்சியில் இருப்பவர்களின் செயல்பாடுகளைப் பொறுத்தது மட்டுமே. அவர்களின் நிர்வாகத் திறமையைப் பொறுத்தே அதன் ஆயுள் அமையும்."

மாநில அரசின் கடன் சுமை குறித்த தவெக அரசின் குற்றச்சாட்டுகளுக்குப் பொருளாதார ரீதியாக விளக்கமளித்த அவர், புதிய நிர்வாகிகளை வறுத்தெடுத்தார். அரசு நிர்வாகத்தில் திட்டங்களைச் செயல்படுத்துவதற்குக் கடன் வாங்குவது ஒன்றும் புதிய விஷயம் அல்ல. தவெகவுக்கு முன்பு ஆட்சியில் இருந்தவர்களும் கடன் வாங்கினார்கள், நாங்கள் ஆட்சியில் இருந்தபோதும் கடன் வாங்கினோம். அது ஒரு தொடர் நடைமுறை.

தவெக அரசு தற்பொழுது வெளியிட்டிருப்பது 'வெள்ளை அறிக்கை' அல்ல, அது ஒரு 'கருப்பு அறிக்கை'. அரசியல் அனுபவமில்லாத புதியவர்களுக்கு நிதித்துறை சார்ந்த நுணுக்கங்களும், அதன் செயல்பாடுகளும் புரிய வாய்ப்பில்லை என்று அவர் சாடினார். மாநிலத்தில் நிலவும் சட்டம்-ஒழுங்கு நிலை குறித்துப் பேசிய துரைமுருகன், குற்றங்களை ஒடுக்கக் கடுமையான வழிமுறைகளைக் கையாள வேண்டும் என வலியுறுத்தினார்:

தமிழ்நாட்டில் சட்டம்-ஒழுங்கு முற்றிலும் கெட்டுப் போய் விட்டது. பாலியல் குற்றங்கள் மற்றும் கொடூரச் செயல்களில் ஈடுபடும் குற்றவாளிகளைச் சட்டம் தன் கையில் எடுத்துச் சுட்டுத் தள்ள வேண்டும். ஆட்சியாளர்கள் உடனடியாக இதில் கவனம் செலுத்தி, பொதுமக்களுக்கும் பெண்களுக்கும் பாதுகாப்பான சூழலை உருவாக்க உரிய நடவடிக்கை எடுக்க வேண்டும் என்று அவர் கேட்டுக்கொண்டார்.

மேலும், மேக்கேதாட்டு அணை விவகாரத்தில் கர்நாடக முதல்வர் பொறுப்புடன் பேச வேண்டும் என்றும், அவரால் தமிழகத்தின் அனுமதியின்றி அணையைக் கட்ட முடியாது என்றும் துரைமுருகன் தனது பேட்டியில் திட்டவட்டமாகக் குறிப்பிட்டுள்ளார்.