சர்வதேச விளையாட்டு அரங்கில் டென்னிஸ் ரசிகர்களின் ஆவலோடு எதிர்பார்க்கப்பட்ட புகழ்பெற்ற விம்பிள்டன் கிராண்ட்ஸ்லாம் டென்னிஸ் தொடர் லண்டனில் தொடக்கத்தைப் பெற்றுள்ளது.

லண்டனின் புகழ்பெற்ற புல்வெளி மைதானத்தில் தொடங்கிய இந்த ஆண்டின் விம்பிள்டன் டென்னிஸ் தொடரின் முதல் நாளிலேயே, உலகின் முன்னணி நட்சத்திர வீரர்களான ஜானிக் சின்னர் மற்றும் நோவக் ஜோகோவிச் ஆகியோர் தங்களது முதல் சுற்று போட்டிகளில் போராட்டத்திற்குப் பின் வெற்றி பெற்று அடுத்த சுற்றுக்கு முன்னேறியுள்ளனர்.

ஆண்கள் ஒற்றையர் பிரிவின் முதல் சுற்று ஆட்டத்தில், நடப்பு விம்பிள்டன் சாம்பியனான இத்தாலியின் இளம் நட்சத்திரம் ஜானிக் சின்னர், செர்பிய நாட்டின் பலமிக்க வீரரான மியோமிர் கேக்மனோவிச்சை எதிர்கொண்டார்.

போட்டியின் முதல் செட்டை 4-6 என இழந்த சின்னர் ரசிகர்களுக்கு அதிர்ச்சி அளித்தார். எனினும், சுதாரித்துக் கொண்டு இரண்டாவது செட்டை 6-3 எனக் கைப்பற்றினார்.

மீண்டும் மூன்றாவது செட்டை டை-பிரேக்கர் வரை சென்று 6-7 என இழந்த சின்னர், பின்னர் தனது ஆக்ரோஷமான ஆட்டத்தை வெளிப்படுத்தினார். அடுத்த இரு செட்களையும் 6-2, 6-3 என்ற கணக்கில் நேர்த்தியுடன் கைப்பற்றி, ஒட்டுமொத்தமாக 4-6, 6-3, 6-7, 6-2, 6-3 என்ற செட் கணக்கில் போராடி த்ரில் வெற்றி பெற்றார்.

மற்றொரு விறுவிறுப்பான முதல் சுற்று ஆட்டத்தில், 24 கிராண்ட்ஸ்லாம் பட்டங்களை வென்று சாதனை படைத்துள்ள செர்பியாவின்  டென்னிஸ் ஜாம்பவான் நோவக் ஜோகோவிச் , சீனாவின் இளம் வீரரான வூ யிபிங்குடன் பலப்பரீட்சை நடத்தினார்.

இப்போட்டியில் ஜோகோவிச் தனது அனுபவ ஆட்டத்தை வெளிப்படுத்தி முதல் செட்டை 6-4 எனக் கைப்பற்றினார். ஆனால், சீனா வீரர் வூ யிபிங் சற்றும் சளைக்காமல் போராடி இரண்டாவது செட்டை 5-7 எனக் கைப்பற்றி ஜோகோவிச்சிற்கு  நெருக்கடி கொடுத்தார்.

இதன் பின்னர் சுதாரித்துக் கொண்ட ஜோகோவிச், தனது சர்வீஸ் மற்றும் பேக்ஹேண்ட் ஷாட்டுகள் மூலம் அடுத்த இரு செட்களையும் 6-4, 6-4 எனக் கைப்பற்றி, ஒட்டுமொத்தமாக 6-4, 5-7, 6-4, 6-4 என்ற செட் கணக்கில் வூ யிபிங்கை வீழ்த்தி 2-வது சுற்றுக்கு வெற்றிகரமாகத் தகுதி பெற்றார்.

விம்பிள்டன் தொடரின் முதல் நாளிலேயே உலகின் டாப் சீட் வீரர்கள் இருவரும் நெருக்கடிகளைச் சந்தித்து அடுத்த சுற்றுக்கு முன்னேறியிருப்பது, இந்த ஆண்டின் விம்பிள்டன் கோப்பையை வெல்லப்போவது யார் என்ற எதிர்பார்ப்பை உலக டென்னிஸ் ரசிகர்களிடையே எகிற வைத்துள்ளது.