இத்தாலியின் மிலன் மற்றும் கார்டினா நகரங்களில் கோலாகலமாக நடைபெற்று வந்த 25-ஆவது குளிர்கால ஒலிம்பிக் போட்டிகள் நேற்றுடன் (பிப்ரவரி 23) நிறைவடைந்தன. கடந்த 16 நாட்களாக நடைபெற்ற இந்தப் பனிச்சறுக்கு மற்றும் பனி விளையாட்டுகளின் திருவிழாவில், நார்வே நாடு பதக்கப் பட்டியலில் முதலிடம் பிடித்து தனது ஆதிக்கத்தை நிலைநாட்டியுள்ளது. இந்த ஒலிம்பிக் தொடரில் 92 நாடுகளைச் சேர்ந்த 2,871 வீரர், வீராங்கனைகள் பங்கேற்றனர். மொத்தம் 116 பிரிவுகளில் போட்டிகள் நடைபெற்ற நிலையில், நார்வே நாடு தங்களது பாரம்பரிய விளையாட்டான பனிச்சறுக்கில் அபாரமான திறமையை வெளிப்படுத்தியது.

பதக்கப் பட்டியல் நிலவரம்: நார்வே 18 தங்கம், 12 வெள்ளி, 11 வெண்கலம் என மொத்தம் 41 பதக்கங்களுடன் முதலிடத்தைத் தக்கவைத்துக் கொண்டது. 12 தங்கம் உட்பட 33 பதக்கங்களுடன் அமெரிக்கா இரண்டாம் இடத்தைப் பிடித்தது. 10 தங்கம் உட்பட 20 பதக்கங்களுடன் நெதர்லாந்து மூன்றாம் இடத்தைப் பெற்றது. போட்டியை நடத்திய இத்தாலி 30 பதக்கங்களுடன் (10 தங்கம்) நான்காம் இடத்தைப் பிடித்தது.

நார்வேயின் ஸ்கீயிங் நட்சத்திரம் ஜோஹன்னஸ் ஹோஸ்ஃப்ளாட் கிளேபோ, இந்த ஒரே தொடரில் மட்டும் 6 தங்கப் பதக்கங்களை வென்று புதிய உலக சாதனை படைத்துள்ளார். குளிர்கால ஒலிம்பிக் வரலாற்றில் ஒரே எடிஷனில் அதிக தங்கம் வென்ற வீரர் என்ற பெருமையை இவர் பெற்றுள்ளார்.

இந்த முறை இந்தியாவிலிருந்து இரு பிரிவுகளில் வீரர்கள் பங்கேற்றனர். கடும் முயற்சி எடுத்த போதிலும், இந்தியாவிற்குப் பதக்கம் ஏதும் கிடைக்கவில்லை என்பது ரசிகர்களுக்குச் சற்று ஏமாற்றமாக அமைந்தது. வெரோனா அரினாவில் நடைபெற்ற கண்கவர் கலை நிகழ்ச்சிகளுடன் போட்டிகள் நிறைவு பெற்றன. பாரம்பரிய முறைப்படி, ஒலிம்பிக் கொடி அடுத்ததாக 2030-ம் ஆண்டு போட்டிகளை நடத்த உள்ள பிரான்ஸ் நாட்டிடம் ஒப்படைக்கப்பட்டது.