தஞ்சை மாவட்டம் கும்பகோணம் அருகே இன்று மதியம் நிகழ்ந்த சாலை விபத்தில், அரசுப் பேருந்து மோதியதில் இருசக்கர வாகனத்தில் சென்ற பெண் ஒருவர் சம்பவ இடத்திலேயே உயிரிழந்தார்.

கும்பகோணத்தைச் சேர்ந்த சுகுமார், தனது மனைவி அன்புச்செல்வி மற்றும் 2 வயது மகன் அஸ்வந்த் ஆகியோருடன் இருசக்கர வாகனத்தில் வெளியே சென்று கொண்டிருந்தார். அவர்கள் கும்பகோணம் பிரதான சாலையில் சென்று கொண்டிருந்த போது, பின்னால் வந்த அரசுப் பேருந்து ஒன்று எதிர்பாராதவிதமாக சுகுமாரின் பைக்கின் பின்புறம் பலமாக மோதியது.

மோதிய வேகத்தில் நிலைதடுமாறி மூவரும் கீழே விழுந்தனர். இதில் அன்புச்செல்வியின் தலையில் பலத்த காயம் ஏற்பட்டு, ரத்த வெள்ளத்தில் அவர் சம்பவ இடத்திலேயே துடிதுடித்து உயிரிழந்தார். அதிர்ஷ்டவசமாகச் சுகுமாரும், அவரது 2 வயது குழந்தையும் லேசான காயங்களுடன் உயிர் தப்பினர்.

விபத்து நடந்தவுடன் பேருந்தை நிறுத்திவிட்டு ஓட்டுநர் தப்பியோடிவிட்டார். தகவலறிந்து வந்த போலீசார், அன்புச்செல்வியின் உடலைக் கைப்பற்றிப் பிரேதப் பரிசோதனைக்காகக் கும்பகோணம் அரசு மருத்துவமனைக்கு அனுப்பி வைத்தனர். அரசுப் பேருந்துகளின் அதிவேகமே இத்தகைய விபத்துகளுக்குக் காரணம் எனக்கூறி அப்பகுதி மக்கள் சிறிது நேரம் சாலை மறியலில் ஈடுபட்டதால் போக்குவரத்து பாதிக்கப்பட்டது.

இந்த விபத்து குறித்து கும்பகோணம் போலீசார் வழக்குப் பதிவு செய்து, தப்பியோடிய பேருந்து ஓட்டுநரைத் தேடி வருகின்றனர். குடும்பத்துடன் சென்றபோது நேர்ந்த இந்த அகால மரணம் அப்பகுதியில் பெரும் சோகத்தை ஏற்படுத்தியுள்ளது.