ஈரோடு மாவட்டம் பவானி அருகே, வீட்டில் தனியாக இருந்த 74 வயது மூதாட்டியைத் தாக்கி, பாலியல் வன்கொடுமை செய்த சம்பவத்தில் ஈடுபட்ட இரண்டு போதை இளைஞர்களைப் பொதுமக்கள் மடக்கிப் பிடித்து போலீசாரிடம் ஒப்படைத்துள்ளனர். மனிதநேயமற்ற இக்கொடூரச் சம்பவம் ஈரோடு மாவட்ட மக்கள் மத்தியில் பெரும் அதிர்ச்சியையும், ஆத்திரத்தையும் ஏற்படுத்தியுள்ளது.

ஈரோடு மாவட்டம் பவானி அடுத்த ஒரு கிராமத்தைச் சேர்ந்தவர் 74 வயது மூதாட்டி. இவர் தனது வீட்டில் தனியாக வசித்து வந்துள்ளார். இந்நிலையில், நேற்று இரவு அந்தப் பகுதியைச் சேர்ந்த இரண்டு இளைஞர்கள், கடுமையான போதையில் மூதாட்டியின் வீட்டிற்குள் அத்துமீறி நுழைந்துள்ளனர்.

வீட்டில் மூதாட்டி தனியாக இருப்பதைச் சாதகமாகப் பயன்படுத்திக் கொண்ட அந்த போதை ஆசாமிகள், அவரை வாயைப் பொத்தித் தாக்கியுள்ளனர். தொடர்ந்து, அந்த மூதாட்டியைப் பாலியல் வன்கொடுமை செய்துள்ளனர். மூதாட்டியின் அலறல் சத்தம் கேட்டு அக்கம் பக்கத்தினர் ஓடிவந்துள்ளனர்.

பொதுமக்கள் வருவதைக் கண்டதும் அந்த இரண்டு போதை இளைஞர்களும் அங்கிருந்து தப்பியோட முயன்றனர். ஆனால், உஷாரான கிராம மக்கள் அவர்கள் இருவரையும் நாலாபுறமும் சூழ்ந்து மடக்கிப் பிடித்தனர். மூதாட்டிக்கு நேர்ந்த கொடுமையைக் கண்டு ஆத்திரமடைந்த பொதுமக்கள், இருவருக்கும் சம்பவ இடத்திலேயே வைத்துத் தர்மஅடி கொடுத்தனர்.

இது குறித்து பவானி காவல் நிலையத்திற்குத் தகவல் கொடுக்கப்பட்டது. தகவல் அறிந்ததும் சம்பவ இடத்திற்கு விரைந்து வந்த போலீசார், பொதுமக்களிடம் இருந்து அந்த இரண்டு நபர்களையும் மீட்டனர். பாதிக்கப்பட்ட மூதாட்டி சிகிச்சைக்காக அரசு மருத்துவமனையில் அனுமதிக்கப்பட்டுள்ளார்.

கொடூரச் செயலில் ஈடுபட்ட இரண்டு இளைஞர்களையும் போலீசார் முறைப்படி கைது செய்து, அவர்கள் மீது கடுமையான பிரிவுகளின் கீழ் வழக்குப் பதிவு செய்து தீவிர விசாரணை மேற்கொண்டு வருகின்றனர். இச்சம்பவம் பவானி மற்றும் அதன் சுற்றுவட்டாரப் பகுதிகளில் பெரும் பரபரப்பை ஏற்படுத்தியுள்ளது.