மகளிர் உரிமைத் தொகையில்  புதிய விண்ணப்பங்கள் எப்போது? பெண்கள் மத்தியில் பெரும் எதிர்பார்ப்பு!

தமிழகத்தில் தற்போதைய அரசியல் மற்றும் பொதுமக்கள் விவாதங்களில் மிக முக்கியமான இடத்தைப் பிடித்துள்ள மகளிர் உரிமைத்தொகை திட்டத்தை முழுமையான அளவில் மறுசீரமைப்பு செய்வதற்கான தொடக்கப் பணிகள் திரைமறைவில் விறுவிறுப்பாக நடைபெற்று வருவதாகத் தகவல்கள் கசிந்துள்ளன. கடந்த ஆட்சிக் காலத்தில் இத்திட்டத்திற்காக நடத்தப்பட்ட பிரத்யேக முகாம்கள் வழியாக விண்ணப்பித்து, பல்வேறு காரணங்களால் நிராகரிக்கப்பட்டு மேல்முறையீடு செய்திருந்த ஆயிரக்கணக்கான பெண்களின் நிலுவை மனுக்கள் தற்போது புதிய அரசு பொறுப்பேற்றதைத் தொடர்ந்து முழுமையாகப் பரிசீலிக்கப்பட்டு வருகின்றன.

அதன் தொடர்ச்சியாக, தகுதியுடையவர்கள் என கண்டறியப்பட்ட புதிய பயனாளிகளின் வங்கிக் கணக்குகளிலும் கடந்த மே 15ஆம் தேதி மாதாந்திர உரிமைத்தொகையாகத் தலா ரூ.1,000 செலுத்தப்பட்டு வருவது பெண்களிடையே மிகுந்த மகிழ்ச்சியை ஏற்படுத்தியுள்ளது.தற்போதைய நிலவரப்படி தமிழகத்தில் சுமார் 1.3 கோடி பெண்கள் இந்த மாதாந்திர உதவித்தொகையைப் பெற்றுப் பயனடைந்து வரும் நிலையில், தேர்தல் கால வாக்குறுதியான மாதந்தோறும் வழங்கப்படும் உதவித்தொகையை ரூ.2,500 ஆக உயர்த்துவது குறித்த சாத்தியக்கூறுகளை புதிய அரசு தற்போது தீவிரமாக ஆராய்ந்து வருகிறது. ஒருவேளை இந்த உதவித்தொகை உயர்த்தப்படும் பட்சத்தில் அரசுக்கு ஆண்டுதோறும் கூடுதலாகச் சுமார் ரூ.23,400 கோடிக்கும் மேல் நிதி தேவைப்படும் என்பதால், இந்த பிரம்மாண்ட நிதிச் சுமையைக் கையாள்வது எப்படி என்பது குறித்து அரசு தீவிரமாக ஆலோசித்து வருகிறது.

இதனால் வரவிருக்கும் இடைக்கால பட்ஜெட் மற்றும் முழுமையான நிதிநிலை அறிக்கை தாக்கல் செய்யப்பட்ட பிறகே, புதிய விண்ணப்பங்கள் பெறுவது மற்றும் தொகை உயர்வு குறித்த இறுதி அறிவிப்புகள் அதிகாரப்பூர்வமாக வெளியாகும் எனத் தெரிகிறது.மேலும், உரிமைத்தொகை உயர்த்தப்படும் பட்சத்தில் உண்மையான ஏழை எளிய மற்றும் விளிம்புநிலை நடுத்தரக் குடும்பப் பெண்களுக்கு மட்டுமே அது சென்றடைய வேண்டும் என்பதில் அரசு உறுதியாக உள்ளதால், பயனாளிகளுக்கான தகுதி நிபந்தனைகள் மற்றும் விதிகளில் சில புதிய மாற்றங்களைக் கொண்டு வரவும் அரசு திட்டமிட்டுள்ளது. இதனால் பட்ஜெட் கூட்டத்தொடருக்குப் பிறகு தகுதி வாய்ந்த புதிய பயனாளிகளிடம் இருந்து விண்ணப்பங்களைப் பெறுவதற்கான சிறப்பு முகாம்கள் மாவட்ட வாரியாக நடத்தப்படலாம் என்று எதிர்பார்க்கப்படுகிறது.