தமிழ்நாட்டில் வளிமண்டல மேலடுக்குச் சுழற்சி மற்றும் மேற்குத் திசைக் காற்றின் வேக மாறுபாடு காரணமாக, இன்று முதல் அடுத்த 3 நாட்களுக்குப் பல்வேறு மாவட்டங்களில் கனமழை பெய்ய வாய்ப்புள்ளதாகச் சென்னை மண்டல வானிலை ஆய்வு மையம் தெரிவித்துள்ளது.

இன்று ஜூலை 30ம் தேதி மேற்குத் தொடர்ச்சி மலையை ஒட்டிய நீலகிரி மற்றும் கோயம்புத்தூர் ஆகிய 2 மாவட்டங்களின் மலைப்பகுதிகளில் ஓரிரு இடங்களில் கனமழை பெய்ய வாய்ப்புள்ளது.

ஜூலை 31 மற்றும் ஆகஸ்ட் 1ம் தேதிகளில் கோயம்புத்தூர், நீலகிரி, தேனி, திருநெல்வேலி மற்றும் கன்னியாகுமரி ஆகிய 5 மாவட்டங்களில் ஓரிரு இடங்களில் பலத்த கனமழை பெய்யக்கூடும் என எச்சரிக்கப்பட்டுள்ளது. கனமழை பொழியக்கூடிய வாய்ப்புள்ள மாவட்டங்களுக்கு வானிலை ஆய்வு மையம் 'மஞ்சள் எச்சரிக்கை' விடுத்துள்ளது.

மலைப்பகுதிகள் மற்றும் நீர்நிலைகளின் அருகே வசிக்கும் பொதுமக்கள் மற்றும் சுற்றுலாப் பயணிகள் போதிய முன்னெச்சரிக்கை நடவடிக்கைகளுடன் இருக்குமாறு கேட்டுக்கொள்ளப்பட்டுள்ளனர்.