போராட்டத்திற்கான காரணம்: மகாராஷ்டிராவில் கடந்த மார்ச் மாதம் மருந்து ஆய்வாளர் பணிக்கான 'குருப்-பி' தேர்வு நடைபெற்றது. தேர்வு நிறைவடைந்த நிலையில், அதன் வினாத்தாள் கசிந்தது வெளிச்சத்திற்கு வந்தது. இந்த முறைகேடு தொடர்பாகத் தேர்வில் 7-வது இடம்பிடித்த பெண் தேர்வர் உள்பட 7 பேரை மும்பை காவல்துறையினர் கைது செய்தனர். அரசுத் தேர்வுகளில் தொடர்ச்சியாக நடைபெறும் முறைகேடுகள் மற்றும் வினாத்தாள் கசிவுகளைக் கண்டித்தே இந்தத் தீவிரப் போராட்டம் முன்னெடுக்கப்பட்டது.

தேர்வு செயல்முறைகளில் முழுமையான வெளிப்படைத்தன்மை இருக்க வேண்டும் என்பதை வலியுறுத்தி, அரசு வேலை தேடும் இளைஞர்களும் ஆயிரக்கணக்கான தேர்வர்களும் புனேயில் திடீரெனத் திரண்டனர். பின்னர் அவர்கள் ஓம்காரேஸ்வர் கோவில் சவுக்கில் இருந்து புறப்பட்டு மாவட்ட ஆட்சியர் அலுவலகம் நோக்கிப் பேரணியாகச் சென்றனர்.

அப்போது மாநில பணியாளர் தேர்வாணையத்தின் தலைவர் மற்றும் செயலாளர் ஆகியோர் உடனடியாகத் தங்களது பதவிகளை ராஜினாமா செய்ய வேண்டும் என்றும், நேர்மையான அதிகாரிகளை அந்தப் பதவிகளில் நியமிக்க வேண்டும் என்றும் முழக்கங்களை எழுப்பினர்.

இளைஞர்களின் இந்தப் போராட்டத்திற்கு வலுசேர்க்கும் வகையில் எதிர்க்கட்சித் தலைவர்கள் நேரில் சென்று ஆதரவு தெரிவித்தனர். தேசியவாத காங்கிரஸ் கட்சியின் (எஸ்.பி.) செயல் தலைவர் சுப்ரியா சுலே, அக்கட்சியைச் சேர்ந்த ரோகித் பவார் எம்.எல்.ஏ. மற்றும் காங்கிரஸ் எம்.எல்.ஏ. விஸ்வஜித் கதம் ஆகியோர் போராட்டத்தில் கலந்து கொண்டு இளைஞர்களுக்குத் தங்களது ஆதரவை வெளிப்படுத்தினர்.

டெல்லியில் நடைபெற்ற போராட்டங்களின் வரிசையில், புனேயிலும் இளைஞர்கள் பெருமளவில் திரண்டு போராட்டத்தில் ஈடுபட்டது அப்பகுதியில் பெரும் பரபரப்பை ஏற்படுத்தியுள்ளது.