கிச்சனில் கரப்பான்பூச்சி தொல்லையா? சமையலறைக்குள் நுழைய விடாமல் தடுக்கும் எளிய வழிகள்!

பல வீடுகளில் கரப்பான்பூச்சிகளின் தொல்லை பெரும் தலைவலியாகவே இருக்கிறது. குறிப்பாக, நாம் சமைக்கும் சமையலறைப் பகுதியில் இவற்றின் நடமாட்டம் மிக அதிகமாகக் காணப்படுகிறது. ஆய்வுகளின்படி, கரப்பான்பூச்சிகள் ஆபத்தான பாக்டீரியாக்களைத் தங்களது உடலில் சுமந்து வந்து சமையல் மேடை மற்றும் உணவுகளை மாசுபடுத்திச் சுகாதாரப் பிரச்சினைகளை ஏற்படுத்துகின்றன. இவற்றை எளிய இயற்கை வழிகள் மூலம் சமையலறைக்குள் நுழைய விடாமல் முற்றிலும் தடுத்துவிடலாம்.

முதலில், பேக்கிங் சோடா மற்றும் சர்க்கரையைச் சம அளவில் கலந்து கரப்பான்பூச்சி நடமாடும் அலமாரிகள் மற்றும் குளிர்சாதனப் பெட்டியின் பின்புறம் வைக்க வேண்டும். சர்க்கரையின் இனிப்பு சுவையால் கவரப்பட்டு வரும் பூச்சிகள், அதனுடன் இருக்கும் பேக்கிங் சோடாவைச் சாப்பிடும்போது அவற்றின் செரிமான மண்டலம் பாதிக்கப்பட்டு அழிகின்றன. இதேபோல், கடுமையான நறுமணம் கொண்ட புதினா, யூகலிப்டஸ், ரோஸ்மேரி போன்ற அத்தியாவசிய எண்ணெய்களைத் தண்ணீரில் கலந்து சுவர்களின் விரிசல்களில் தெளிப்பதன் மூலமும், காய்ந்த பிரியாணி இலைகளைப் பொடியாக்கி அலமாரிகளில் தூவுவதன் மூலமும் இவற்றை நிரந்தரமாக விரட்டலாம்.

மேலும், சம அளவில் வினிகர் மற்றும் தண்ணீரை ஒன்றாகக் கலந்து சமையலறை மேடை, அலமாரிகள் மற்றும் தரையைத் துடைத்துப் பராமரிக்கலாம். இது கரப்பான்பூச்சிகளை ஓட ஓட விரட்டுவதோடு, அவை வரக் காரணமான எண்ணெய் பிசுபிசுப்பையும் முழுமையாக நீக்குகிறது. வீட்டின் மூலைகளில் போரிக் அமிலத் தூளுடன் சர்க்கரை கலந்து தூவுவதும் சிறந்த பலனைத் தரும் என்றாலும், குழந்தைகள் மற்றும் செல்லப்பிராணிகள் இருக்கும் வீட்டில் இதனைப் பயன்படுத்தும்போது கூடுதல் விழிப்புணர்வுடன் கவனமாகக் கையாளுவது அவசியமாகும்.