’என் பொண்ணு தான் என் உயிர்’.. தற்கொலைக்கு காரணமானவனை பழிவாங்க தான் செஞ்சோம்.. அதிர்ச்சி வாக்குமூலம்!

நீலகிரி மாவட்டம் பந்தலூர் அருகே சேரங்கோடு பகுதியை சேர்ந்தவர் மகாலிங்கம். இவரது மகன் தமிழ்செல்வன் (27). இவர் கோவை அருகே துடியலூரில் உள்ள தனியார் மருத்துவமனையில் டிரைவராக வேலை பார்த்து வந்தார். இவரது தாயாரின் சொந்த ஊர் விருதுநகர் மாவட்டம் ராஜபாளையம் அருகே உள்ள அய்யன் கொல்லகொண்டான். தமிழ்செல்வன் அடிக்கடி தனது தாயாரின் ஊருக்குச் செல்லும் போது, ​​அந்தப் பகுதியைச் சேர்ந்த மலைக்கனி (47) என்பவரது மகள் ஆனந்தியை சந்தித்து காதலித்து வந்துள்ளார்.

அப்போது, ​​தன்னை திருமணம் செய்து கொள்ளுமாறு தமிழ்செல்வனிடம் ஆனந்தி கூறியுள்ளார். அப்போது தமிழ்செல்வனும் திருப்பூர் மாவட்டம் உடுமலையை சேர்ந்த ஒரு பெண்ணை காதலித்து வந்துள்ளார். இதனால் ஆனந்தியை திருமணம் செய்யாமல் தமிழ்செல்வன் காலம் கடத்தினார். இதனால் மனமுடைந்த ஆனந்தி தூக்குப்போட்டு தற்கொலை செய்து கொண்டார். ஆனந்தியின் தற்கொலைக்கு தமிழ்செல்வன் தான் காரணம் என ஆனந்தியின் தந்தை மலைக்கனி மற்றும் அவரது சகோதரர் ராஜாராம் (25) ஆகியோர் முடிவு செய்தனர். மகளை காதலித்து தற்கொலைக்கு காரணமான தமிழ்செல்வனை கொலை செய்ய திட்டமிட்டனர். இதற்காக இருவரும் மகளின் காதலன் எங்கே என்று தேடி வந்தனர்.

அப்போது கோவை அருகே துடியலூரில் உள்ள தனியார் மருத்துவமனையில் தமிழ்செல்வன் டிரைவராக வேலை பார்த்து வருவது தெரியவந்தது. இதையடுத்து நேற்று காலை தந்தையும் மகனும் ராஜபாளையத்தில் இருந்து கோவைக்கு பைக்கில் வந்தனர். மதியம் 12 மணியளவில் துடியலூர் வந்ததும் தமிழ்செல்வனின் செல்போனுக்கு அழைத்து பேசினர். மறுமுனையில் பேசிய தமிழ்செல்வனிடம் அவர் எங்கே என்று கேட்டனர். மருத்துவமனையில் இருப்பதாக கூறினார். அவருடன் சிறிது நேரம் பேச விரும்பி மருத்துவமனையில் இருந்து வெளியே வர முடியுமா என்று கேட்டனர். தமிழ்செல்வன் வருகிறேன் என்று கூறிவிட்டு வெளியே வந்தார். இதையடுத்து, மருத்துவமனையில் இருந்து சற்று தள்ளி, ஆட்கள் நடமாட்டம் இல்லாத இடத்திற்கு அவரை இருவரும் அழைத்துச் சென்றனர். அங்கு மகள் தற்கொலை செய்து கொண்டது தொடர்பாக அவர்களுக்குள் வாக்குவாதம் ஏற்பட்டது. இதனால் ஆத்திரமடைந்த இருவரும் தமிழ்செல்வனை கத்தியால் பலமுறை குத்தினர். தமிழ்செல்வன் சமநிலை இழந்து கீழே விழுந்தார். பின்னர், ஆடு அறுப்பது போல் கழுத்தை அறுத்துவிட்டு பைக்கில் தப்பினர்.

தகவலறிந்து சம்பவ இடத்திற்கு விரைந்து வந்த போலீசார், தமிழ்செல்வனின் உடலை கைப்பற்றி பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். கொலையாளிகளை பிடிக்க தனிப்படை அமைக்கப்பட்டது. அங்குள்ள சிசிடிவி கேமராவில் பதிவான காட்சிகளை தனிப்படை போலீசார் ஆய்வு செய்தனர். அதில், மலைக்கனியும், ராஜாராமும், தமிழ்செல்வனை மருத்துவமனையில் இருந்து வெளியே அழைத்துச் செல்வது பதிவாகி, அவரை கொன்றுவிட்டு இருவரும் பைக்கில் தப்பினர்.

கொலை நடந்த இடத்தில் மலைக்கனியும் தனது மொபைல் போனை வைத்து விட்டு சென்று விட்டார். அதை பறிமுதல் செய்த போலீசார், அந்த போனில் ராஜாராமின் எண் பதிவாகி இருந்தது தெரியவந்தது. அந்த எண்ணை பயன்படுத்தி ராஜாராமின் மொபைல் போனுக்கு போலீசார் அழைத்தனர். அப்போது கொலையை ஒப்புக்கொண்ட அவர், இருவரும் தாராபுரம் செல்லும் வழியில் குண்டடம் அருகே பைக்கில் சென்றதாக கூறினார். இதையடுத்து தனிப்படை போலீசார் குண்டடம் போலீசாருக்கு தகவல் தெரிவித்தனர். தந்தையையும் மகனையும் பிடித்தனர். பின்னர் துடியலூர் போலீசார் குண்டடம் சென்று தந்தை, மகன் இருவரையும் கைது செய்து துடியலூர் காவல் நிலையத்துக்கு அழைத்து வந்து விசாரணை நடத்தினர்.

கைதான மலைக்கனி அளித்த வாக்குமூலம் குறித்து போலீசார் கூறியதாவது: எனது மகள் ஆனந்தி பெங்களூருவில் உள்ள ஐடி நிறுவனத்தில் பணியாற்றி வந்தார். நான் புற்றுநோயால் பாதிக்கப்பட்டுள்ளேன். என் மருத்துவ செலவுக்காக நகைகளை அடகு வைத்து பணம் கொடுத்து என்னை கவனித்து வந்தார். என் மகள் மீது என் உயிரையே வைத்திருந்தேன். எனது மகள் தற்கொலைக்கு தமிழ்செல்வன் தான் காரணம் என தெரிந்ததால், பழிவாங்க அவரை கொன்றோம். இவ்வாறு அவர் வாக்குமூலம் அளித்ததாக போலீசார் தெரிவித்தனர்.

ஸ்பெஷல்... சங்காபிஷேகம் விரதமுறை, பலன்கள்!

ஐயப்ப பக்தர்கள் தினசரி சொல்ல வேண்டிய ஸ்லோகம் இது தான்!

ஐயப்பன் பக்தர்கள் தெரிஞ்சிக்கோங்க ... சபரிமலை சுவாரஸ்யங்கள்!

கார்த்திகை மாத சிறப்புகள், பண்டிகைகள் , வழிபாடுகள்... முழு தகவல்கள்!