ஆசிய விளையாட்டு போட்டியில் வினேஷ் போகத்துக்கு அனுமதி - உயர்நீதிமன்றம் உத்தரவு!

இந்தியாவின் முன்னணி மல்யுத்த நட்சத்திர வீராங்கனையான வினேஷ் போகத், ஆசிய விளையாட்டுப் போட்டிகளுக்கான இந்திய அணியைத் தேர்ந்தெடுக்கும் தகுதிச் சுற்றுப் போட்டிகளில் பங்கேற்க டெல்லி உயர்நீதிமன்றத்தின் தலைமை நீதிபதி அமர்வு அதிரடியான அனுமதி உத்தரவைப் பிறப்பித்துள்ளது. மல்யுத்த கூட்டமைப்பின் முட்டுக்கட்டைகளை உடைத்து வினேஷ் போகத் பெற்றுள்ள இந்த சட்டப்பூர்வ வெற்றி, அவரது விளையாட்டுப் பயணத்தில் ஒரு மிகப்பெரிய திருப்புமுனையாகப் பார்க்கப்படுகிறது.

இந்திய மல்யுத்த கூட்டமைப்பு சமீபத்தில் வெளியிட்ட புதிய தேர்வு விதிமுறைகளின்படி, கடந்த 2025 மற்றும் 2026-ஆம் ஆண்டுகளில் நடைபெற்ற தேசிய அளவிலான போட்டிகளில் பதக்கங்கள் வென்றவர்கள் மட்டுமே ஆசிய விளையாட்டுத் தகுதிச் சுற்றில் பங்கேற்க முடியும் என அறிவிக்கப்பட்டிருந்தது. வினேஷ் போகத் தனது மகப்பேறு விடுப்பு மற்றும் பிரசவத்திற்குப் பிந்தைய உடல்நல மீட்புக் காலம் காரணமாக இந்த இடைப்பட்ட காலத்தில் எந்தவொரு தேசியப் போட்டிகளிலும் பங்கேற்கவில்லை. இதனைத் தகுதியாகக் காட்டி, அவருக்குத் தகுதிப் போட்டிகளில் பங்கேற்க மல்யுத்த கூட்டமைப்பு தடை விதித்திருந்தது.

இத்தடையை எதிர்த்து வினேஷ் போகத் தொடர்ந்த மேல்முறையீட்டு வழக்கை விசாரித்த டெல்லி உயர்நீதிமன்றத் தலைமை நீதிபதி தேவேந்திர குமார் உபாத்யாயா மற்றும் நீதிபதி தேஜஸ் காரியா ஆகியோர் அடங்கிய அமர்வு, மல்யுத்த கூட்டமைப்பின் விதிகள் பழிவாங்கும் போக்கிலும், பாரபட்சமாகவும் இருப்பதாகக் கடுமையான கண்டனங்களை பதிவு செய்தது.

நீதிபதிகள் தங்களது தீர்ப்பில், "விளையாட்டுத் துறையில் பெண் வீராங்கனைகளின் தாய்மை என்பது ஒருபோதும் அவர்களது திறமைக்கான தகுதியிழப்பாகவோ அல்லது அவர்களைப் புறக்கணிப்பதற்கான காரணமாகவோ மாறக்கூடாது. பிரசவக் காலத்தில் ஒரு பெண் வீராங்கனை எதிர்கொள்ளும் உடல் ரீதியான சவால்களை விளையாட்டு நிறுவனங்கள் மனிதாபிமானத்துடனும், விவேகத்துடனும் அணுக வேண்டும். வினேஷ் போகத் போன்ற சர்வதேசப் புகழ்பெற்ற 'ஐகானிக்' வீராங்கனைகளை இத்தகைய விதிகளைக் காட்டி விலக்கி வைப்பது முற்றிலும் தன்னிச்சையானது மற்றும் அரசியலமைப்புச் சட்டத்திற்கு எதிரானது" என்று அதிரடியாகத் தெரிவித்தனர்.

இதனையடுத்து, வரும் மே 30 மற்றும் 31 ஆகிய தேதிகளில் நடைபெறவிருக்கும் ஆசிய விளையாட்டு மல்யுத்த தகுதிச் சுற்றுப் போட்டிகளில் வினேஷ் போகத் தங்கு தடையின்றி முழுமையாகப் பங்கேற்கலாம் என நீதிமன்றம் உத்தரவிட்டது. மேலும், இந்தத் தகுதிப் போட்டிகள் முழுவதும் எவ்வித முறைகேடுகளும் இன்றி வெளிப்படைத்தன்மையுடன் நடப்பதை உறுதி செய்ய, ஒட்டுமொத்தப் போட்டிகளையும் முழுமையாக வீடியோ பதிவு செய்ய வேண்டும் என்றும், இந்திய ஒலிம்பிக் சங்கம் மற்றும் இந்திய விளையாட்டு மேம்பாட்டு ஆணையம் ஆகியவற்றின் சார்பில் இரண்டு தனிப்படை சுயாதீனப் பார்வையாளர்கள் முன்னிலையில் தான் போட்டிகள் நடத்தப்பட வேண்டும் என்றும் நீதிமன்றம் நிபந்தனை விதித்துள்ளது.

2024 பாரிஸ் ஒலிம்பிக் தகுதியிழப்புச் சோகத்திலிருந்து மீண்டு,  2026 ஆசிய விளையாட்டைத் தாண்டி 2028 லாஸ் ஏஞ்சல்ஸ் ஒலிம்பிக் போட்டியை நோக்கித் தீவிரமாகத் தயாராகி வரும் வினேஷ் போகத்துக்குக் கிடைத்துள்ள இந்தச் சட்டப்பூர்வ நீதி, ஒட்டுமொத்த இந்தியப் பெண் விளையாட்டு வீரர்களுக்கும் கிடைத்த ஒரு பெரும் அங்கீகாரமாகக் கொண்டாடப்பட்டு வருகிறது.