பெண்கள் கிரிக்கெட் தரவரிசை: மீண்டும் ‘நம்பர் ஒன்’ இடத்தை பிடித்த மிதாலிராஜ்

சர்வதேச கிரிக்கெட் கவுன்சில் (ஐ.சி.சி.) நேற்று பெண்கள் ஒருநாள் கிரிக்கெட்டில் வீராங்கனைகளின் புதிய தரவரிசை பட்டியலை வெளியிட்டது.

இதில் பேட்டிங் தரவரிசையில் இந்திய கேப்டன் மிதாலிராஜ் மீண்டும் முதலிடத்தை (762 புள்ளி) பிடித்துள்ளார். 8-வது இடத்தில் இருந்த மிதாலிராஜ் இங்கிலாந்துக்கு எதிரான ஒருநாள் தொடரில் தொடர்ச்சியாக 3 அரைசதங்கள் (72, 59, 75 ரன்) விளாசியதன் மூலம் முதலிடத்தை பெற்றுள்ளார்.

2005-ம் ஆண்டு முதல் முறையாக ‘நம்பர் ஒன்’ இடத்தைப் பிடித்த மிதாலிராஜ் கடைசியாக 2018-ம் ஆண்டு பிப்ரவரியில் உச்சத்தில் இருந்தார். தற்போது 8-வது முறையாக முதலிடத்தை பெற்றுள்ளார்.
அவரைத் தொடர்ந்து தென் ஆப்பிரிக்காவின் லிசல் லீ (758 புள்ளி) எடுத்து 2-வது இடத்தில் உள்ளார்.

ஒட்டுமொத்த சர்வதேச பெண்கள் கிரிக்கெட்டில் (டெஸ்ட், ஒருநாள் மற்றும் 20 ஓவர் போட்டியை சேர்த்து) அதிக ரன்கள் குவித்தவர் பட்டியலில் மிதாலிராஜ் முதலிடத்துக்கு (10,337 ரன், 317 ஆட்டம்) முன்னேறியுள்ளார் என்பது குறிப்பிடத்தக்கது