மாணவிக்கு பாலியல் தொல்லை... அண்ணாமலை பல்கலைக்கழக பேராசிரியர் பணி நீக்கம்!

அண்ணாமலை பல்கலைக்கழக வேதியியல் துறைத் தலைவர் மீது ஆராய்ச்சி மாணவி அளித்த பாலியல் தொல்லைப் புகாரைத் தொடர்ந்து, அவர் பல்கலைக்கழக நிர்வாகத்தால் உடனடியாகத் தற்காலிக பணி நீக்கம் செய்யப்பட்டுள்ளார். இச்சம்பவம் கல்வி வட்டாரத்திலும் மாணவர்களிடையே பெரும் அதிர்ச்சியை ஏற்படுத்தியுள்ளது.

அண்ணாமலை பல்கலைக்கழகத்தில் வேதியியல் துறைத் தலைவராகப் பணியாற்றி வரும் பேராசிரியர் ராஜேந்திரன் மீது, அங்கு ஆராய்ச்சி மேற்கொண்டு வரும் மாணவி ஒருவர் காவல் நிலையத்தில் புகார் அளித்துள்ளார். அந்தப் புகாரில், பேராசிரியர் தனக்குத் தொடர்ந்து பாலியல் தொல்லை அளித்ததுடன், தனது குடும்பத்தினர் குறித்தும் ஆபாசமான முறையில் திட்டியதாகக் குறிப்பிட்டுள்ளார்.

மாணவியின் புகாரின் தீவிரத்தன்மையைக் கருத்தில் கொண்டு அண்ணாமலைநகர் காவல்துறையினர் உடனடியாகச் செயல்பட்டனர். பேராசிரியருக்கு எதிராக நான்கு கடுமையான பிரிவுகளின் கீழ் வழக்குப் பதிவு செய்யப்பட்டு விசாரணை தீவிரப்படுத்தப்பட்டுள்ளது.

காவல்துறையின் இந்த வழக்குப் பதிவு மற்றும் தொடர் விசாரணையைத் தொடர்ந்து, பல்கலைக்கழக நிர்வாகம் உடனடியாக விழித்துக்கொண்டது. மாணவிக்கு நீதி வழங்கும் வகையிலும், துறை ரீதியான ஒழுங்கு நடவடிக்கையாகவும் பேராசிரியர் ராஜேந்திரனைப் பல்கலைக்கழக நிர்வாகம் தற்காலிகமாகப் பணி நீக்கம் (Suspension) செய்து அதிரடி உத்தரவு பிறப்பித்துள்ளது.