"கட்டணமில்லாக் கல்வி, உணவு, உறைவிடம்" - தமிழகம் முழுவதும் 100 உன்னதப் பள்ளிகள்!

அண்மையில் நடந்து முடிந்த சட்டமன்றத் தேர்தலில் மாபெரும் வெற்றி பெற்றுத் தமிழகத்தில் புதிய ஆட்சிப் பொறுப்பை ஏற்றுள்ள தமிழக வெற்றிக் கழகம், தனது தேர்தல் அறிக்கையில் குறிப்பிட்டிருந்த ஏழை எளிய மாணவர்களுக்கான "100 உன்னதப் பள்ளிகள்"  திட்ட வாக்குறுதி தற்பொழுது மக்கள் மத்தியில் மீண்டும் கவனத்தைப் பெற்றுள்ளது.

கல்வியில் சிறந்து விளங்கும் ஆற்றல் இருந்தும், தங்களது குடும்பத்தின் வறுமை மற்றும் சமூகச் சூழ்நிலைகள் காரணமாக மேல் படிப்பைத் தொடர முடியாமல் தவிக்கும் மாணவர்களைக் கண்டறிந்து அவர்களுக்கு உலகத்தரம் வாய்ந்த கல்வியை வழங்குவதே இத்திட்டத்தின் நோக்கமாகும்:

இந்த உன்னதப் பள்ளிகளில் 6-ஆம் வகுப்பு முதல் 12-ஆம் வகுப்பு வரை  பயிலும் மாணவ, மாணவிகளுக்குக் கல்வி, தங்குவதற்கான உறைவிடம், சத்தான உணவு, பாடநூல்கள் மற்றும் சீருடைகள் உள்ளிட்ட அனைத்து அத்தியாவசியத் தேவைகளும் எவ்விதக் கட்டணமுமின்றி முற்றிலும் இலவசமாக அரசாங்கத்தாலேயே வழங்கப்படும் என தவெக தனது வாக்குறுதியில் உறுதி அளித்துள்ளது.

கிராமப்புற மற்றும் ஏழை மாணவிகளின் உயர்கல்வியை உறுதி செய்யும் பொருட்டு, இந்த மெகா திட்டத்தில் பிரத்தியேகக் கட்டுப்பாடுகள் சேர்க்கப்பட்டுள்ளன. தமிழகம் முழுவதும் தவெக அரசால் தொடங்கப்படவிருக்கும் இந்த 100 உன்னதப் பள்ளிகளில், சரியாக 50 பள்ளிகள் மாணவிகளுக்கென பிரத்தியேகமாகத் தொடங்கப்படும் என அறிவிக்கப்பட்டுள்ளது. இதன் மூலம் பின்தங்கிய குடும்பங்களைச் சேர்ந்த பெண் பிள்ளைகளின் கல்விச் சேர்க்கை மற்றும் பாதுகாப்பு முழுமையாக உறுதி செய்யப்படும் எனத் தெரிவிக்கப்பட்டுள்ளது.