"பாறைகள் வெளியே தெரிந்தன" - திருச்செந்தூரில் பெளர்ணமியையொட்டி 100 அடி உள்வாங்கிய கடல்நீர்!

அறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி கோவில் மற்றும் அய்யா வைகுண்டர் அவதார பதி ஆகியவற்றிற்கு இடைப்பட்ட கடல் பகுதியில், திடீரென சுமார் 100 அடி தூரத்திற்குத் கடல்நீர் பின்னோக்கி உள்வாங்கியுள்ளது.

வழக்கமாகப் பவுர்ணமி மற்றும் அமாவாசை தினங்களில் கடல் அலைகளின் சீற்றத்தில் மாற்றங்கள் ஏற்படுவது இயற்கையான நிகழ்வாகும். அதன் ஒரு பகுதியாக, இன்று பவுர்ணமியையொட்டி கடல்நீர் பெருமளவிற்கு உள்வாங்கியதால் கடலுக்குள் மூழ்கியிருந்த பாசி படர்ந்த பாறைகள் மற்றும் மணல் பரப்புகள் அனைத்தும் வெளியே தெரிந்து வருகின்றன.

இந்த அபூர்வக் காட்சியைக் காண்பதற்காகக் கடற்கரையில் திரண்டிருந்த ஆயிரக்கணக்கான ஆன்மிகப் பக்தர்கள் அந்த இடத்திற்கு விரைந்தனர். கடல்நீர் உள்வாங்கியதைத் தொடர்ந்து, அங்குப் பாதுகாப்பு அச்சுறுத்தல்கள் நிலவிய போதிலும் பொதுமக்கள் பலர் அதனைப் பொருட்படுத்தவில்லை.

"கடற்கரைக்கு வந்த பக்தர்கள் பலர் ஆபத்தின் தீவிரத்தை உணராமல், வழுக்கக்கூடிய அந்தப் பாசிப் பாறைகளின் மீது ஏறி நின்று தங்களது மொபைல் போன்களில் ஆர்வமுடன் செல்பி மற்றும் புகைப்படங்களை எடுத்து வருகின்றனர்."

பவுர்ணமி தினங்களில் கடல் திடீரென உள்வாங்குவதும், பின்னர் சில மணி நேரங்களில் வேகத்துடன் மீண்டும் முன்னோக்கி வருவதும் வழக்கமான ஒன்று என்பதால், அசம்பாவிதங்களைத் தவிர்க்கக் காவல்துறை மற்றும் தீயணைப்புத் துறையினர்  தீவிர எச்சரிக்கை நடவடிக்கைகளை மேற்கொண்டுள்ளனர்.

பாறைகளின் மேல் ஏறி நிற்கும் பக்தர்களைக் கடற்கரைக்குத் திரும்புமாறு ஒலிபெருக்கிகள் மூலம் எச்சரித்து வருவதுடன், ஆபத்தான அந்தப் பகுதிகளில் கூடுதல் போலீசார் நியமிக்கப்பட்டுப் பாதுகாப்புப் பணிகள்  பலப்படுத்தப்பட்டுள்ளன.