ஆசிரியர்களின் அலட்சியத்தால் விபரீதம்... 10ம் வகுப்பு விடைத்தாள் நகலில் 100-க்கு 101 மதிப்பெண்கள்!

தஞ்சாவூர் மாவட்டம் கும்பகோணத்தில் உள்ள ஒரு அரசு உதவி பெறும் பள்ளியில் சமீபத்தில்  நடந்து முடிந்த 10ம் வகுப்பு பொதுத்தேர்வு விடைத்தாள் மதிப்பீட்டில், கல்வித்துறையையே அதிரவைக்கும் ஒரு குளறுபடி வெளிச்சத்திற்கு வந்துள்ளது. அந்தப் பள்ளியில் படித்துப் பொதுத்தேர்வில் 500-க்கு 486 மதிப்பெண்கள் பெற்று முதலிடம் பிடித்த மாணவி புகழேந்திக்கு, தமிழ் பாடத்தில் மட்டும் 91 மதிப்பெண்கள் மட்டுமே வழங்கப்பட்டிருந்தது. இதனால் கணிதம் மற்றும் அறிவியலில் 100-க்கு 100 வாங்கிய அந்த மாணவி, தமிழில் மதிப்பெண் குறைந்ததால் சந்தேகமடைந்து விடைத்தாள் நகல் (ஜெராக்ஸ்) கேட்டு முறைப்படி விண்ணப்பித்திருந்தார்.

நேற்று வெளியான விடைத்தாள் நகலைப் பார்த்த அந்த மாணவியும் அவரது பெற்றோரும் என்ன செய்வதென்று தெரியாமல் ஒட்டுமொத்தமாகப் பேரதிர்ச்சியில் உறைந்து போயினர். விடைத்தாளின் முதல் பக்கத்தில் வினா வாரியாகவும், பக்க வாரியாகவும் மதிப்பெண்களைக் கூட்டியபோது அதன் மொத்தக் கூட்டுத்தொகை 100-க்கு 101 என விசித்திரமாகக் குறிக்கப்பட்டிருந்தது. ஆசிரியர்கள் விடைத்தாளைத் திருத்தியபோது 5 மதிப்பெண் வினாக்களுக்குத் தலா 7 மதிப்பெண்கள் எனத் தவறுதலாகக் கூடுதலாக வழங்கியதே இந்த விபரீதக் குளறுபடிக்கு முக்கியக் காரணம் எனறு கூறப்படுகிறது.

விடைத்தாள் திருத்தியவர், கூர்ந்தாய்வு செய்தவர், தலைமை தேர்வாளர் ஆகிய 3 அதிகாரிகளும் இந்த இமாலயத் தவறை கவனிக்காமல் அலட்சியமாக மதிப்பெண் பட்டியலில் 91 எனப் பதிவு செய்து மாணவியின் எதிர்காலத்தோடு விளையாடியுள்ளனர். இதனால் தங்களுக்கு நேர்ந்த அநீதிக்கு முறைப்படி நீதி வேண்டி, அந்த மாணவி தஞ்சையில் உள்ள தேர்வுத்துறை துணை இயக்குனர் அலுவலகத்தில்  மறு கூட்டலுக்காக அவசர அவசரமாக விண்ணப்பித்துள்ளார். ஆசிரியர்களின் இத்தகைய பொறுப்பற்ற அலட்சியத்தால் ஒரு திறமையான மாணவியின் ஒட்டுமொத்த உழைப்பும் வீணடிக்கப்பட்டுள்ள இந்தச் சம்பவம் கல்வி வட்டாரத்தில்  மிகப்பெரிய விவாதத்தையும் பரபரப்பையும் ஏற்படுத்தியுள்ளது.