ரேஷன் அட்டைதாரர்களுக்கு 13 பொருட்கள் அடங்கிய ஓணம் கிட்.. கேரள முதல்வர் அறிவிப்பு!

கேரளத்தில், ரேஷன் அட்டைதாரர்களுக்கு 13 பொருட்கள் அடங்கிய ஓணம் கிட் வழங்கப்படும் என்று கேரள முதல்வர் பினராயி விஜயன் அறிவித்துள்ளார். 

கேரள மாநிலத்தில் உள்ள அனைத்து ஏய் ரேஷன் கார்டுதாரர்களுக்கும் வரும் செப்டம்பர் 6ம் தேதி முதல் 13 பொருட்கள் அடங்கிய ஓணம் கிட் இந்த ஆண்டு வழங்கப்படும் என்று முதல்வர் பினராயி விஜயன் தெரிவித்தார். கேரளா முழுவதுமாக சுமார் 6 லட்சம் பேர் இந்த திட்டத்தின் மூலமாக பயன்பெறும் என்றும், இந்த முயற்சிக்கு ரூ.36 கோடி செலவாகும் என எதிர்பார்க்கப்படுவதாக செய்தியாளர் சந்திப்பில் முதல்வர் பினராயி விஜயன் தெரிவித்தார்.

கடந்த ஆண்டுகளைப் போலவே, இந்த ஓணம் காலத்திலும் குறைந்த விலையில் தினசரி உபயோகப் பொருட்களை வழங்குவதற்காக சப்ளைகோவின் மேற்பார்வையில் ஓணம் சந்தைகள் ஏற்பாடு செய்யப்படும். செப்டம்பர் 6ம் தேதி முதல் அனைத்து மாவட்ட தலைமையகங்களிலும், செப்டம்பர் 10ம் தேதி முதல் 14ம் தேதி வரை தாலுகா தலைமையகத்திலும் ஓணம் கண்காட்சிகளை சப்ளைகோ ஏற்பாடு செய்யும். 

விவசாயிகளிடம் இருந்து நேரடியாக கொள்முதல் செய்யப்படும் காய்கறிகளை விற்பனை செய்ய சிறப்பு அமைப்பு ஏற்படுத்தப்படும். சப்ளைகோவில் தினசரி அத்தியாவசியப் பொருட்கள் தடையின்றி வழங்க நடவடிக்கை எடுக்கப்பட்டுள்ளதாகவும், மாவேலி அங்காடியில் 13 அன்றாடத் தேவைப் பொருட்கள் மானிய விலையில் விநியோகிக்கப்படும் என்றும் முதலமைச்சர் தெரிவித்தார். 

திரிவேணி ஸ்டோர்ஸ் தயாரிப்புகளுக்கு 10 முதல் 40 சதவீதம் தள்ளுபடியில் வழங்கப்படுகிறது. ஓணம் பண்டிகையின் ஒரு பகுதியாக செப்டம்பர் 11ம் தேதி முதல் 14 வரை 2000 உழவர் சந்தைகள் ஏற்பாடு செய்யப்பட்டுள்ளன. பொதுவான காய்கறிகள் மொத்த சந்தை விலையை விட 10 சதவீதம் மதிப்பில் விவசாயிகளிடமிருந்து கொள்முதல் செய்யப்பட்டு சந்தை விலையை விட 30 சதவீதம் வரை தள்ளுபடியில் விற்கப்படும். அங்கக காய்கறிகள் மொத்த சந்தை விலையை விட 20 சதவீதம் பிரிமியத்தில் விவசாயிகளிடம் இருந்து கொள்முதல் செய்யப்பட்டு சந்தை விலையை விட 10 சதவீதம் வரை தள்ளுபடியில் விற்கப்படும் என்று தெரிவிக்கப்பட்டுள்ளது.