தமிழகத்தின் ஒரே மாவட்டத்தில் 18 நாட்களில் 17 போக்சோ வழக்குகள் பதிவு - புறநகர்ப் பகுதிகளில் பாலியல் குற்றங்கள் அதிகரிப்பு!

திருநெல்வேலி மாவட்டத்தில் கடந்த ஜூன் 1-ஆம் தேதி முதல் ஜூன் 18-ஆம் தேதி வரையிலான குறுகிய காலத்திற்குள் மட்டும் 17 போக்சோ வழக்குகள் பதிவாகியிருப்பது பொதுமக்களிடையேயும், சமூக ஆர்வலர்களிடையேயும் பெரும் அதிர்ச்சியை ஏற்படுத்தியுள்ளது.  குழந்தைகளுக்கு எதிரான பாலியல் குற்றங்களைத் தடுக்கும் நோக்கில் சட்டம் கடுமையாக்கப்பட்டுள்ள போதிலும், மாவட்டத்தின் பல்வேறு பகுதிகளில் இத்தகைய குற்றங்கள் தொடர்ந்து அரங்கேறி வருகின்றன.

பதிவாகியுள்ள 17 வழக்குகளில், திருநெல்வேலி மாநகரக் காவல் எல்லைக்கு உட்பட்ட பகுதிகளில் 5 வழக்குகளும், மாவட்டத்தின் புறநகர்ப் பகுதிகளில்மிக அதிகமாக 12 வழக்குகளும் பதிவாகியுள்ளன. கிராமப்புற மற்றும் புறநகர்ப் பகுதிகளில் இது குறித்த விழிப்புணர்வை மேலும் தீவிரப்படுத்த வேண்டியதன் அவசியத்தை இந்த புள்ளிவிவரங்கள் உணர்த்துகின்றன.

பாதிக்கப்பட்ட சிறுமிகளின் பெற்றோர்கள் அளித்த புகார்களின் அடிப்படையில், அந்தந்தப் பகுதி அனைத்து மகளிர் காவல் நிலைய போலீசார் வழக்குகளைப் பதிவு செய்து துரித நடவடிக்கை மேற்கொண்டுள்ளனர்.

இந்த 17 வழக்குகளின் கீழ் தொடர்புடைய குற்றவாளிகளை போலீசார் உடனடியாகக் கைது செய்து சிறையில் அடைத்துள்ளனர். கைது செய்யப்பட்டவர்களின் வயது விபரங்கள் வெளியிடப்பட்டுள்ள நிலையில், 20 வயதுக்குட்பட்ட இளைஞர்கள்: 3 பேர், 20 வயதுக்கு மேற்பட்டவர்கள்: 12 பேர், 60 வயதுக்கு மேற்பட்ட முதியவர்கள்: 2 பேர். கைது செய்யப்பட்டுள்ளவர்கள் மீது போக்சோ சட்டத்தின் கீழ் கடுமையான பிரிவுகளில் வழக்குகள் பதியப்பட்டு, நீதிமன்றக் காவலில் வைக்கப்பட்டுள்ளனர்.

மாநிலத்தில் புதிய அரசு பொறுப்பேற்ற இந்த குறுகிய காலத்திற்குள் மட்டும், தமிழகம் முழுவதும் ஒட்டுமொத்தமாக 100-க்கும் மேற்பட்ட போக்சோ வழக்குகள் அடுத்தடுத்து பதிவாகியுள்ளன. குழந்தைகளுக்கு எதிரான இத்தகைய குற்றங்களில் ஈடுபடுபவர்கள் யாராக இருந்தாலும், அவர்கள் மீது எவ்விதப் பரிந்துரையுமின்றி குண்டர் சட்டத்தின் கீழ் கடுமையான சட்டப்பூர்வ நடவடிக்கைகள் எடுக்கப்பட வேண்டும் எனப் பொதுமக்கள் தரப்பில் வலியுறுத்தப்பட்டு வருகிறது.