இந்தாண்டிற்குள் 20,000 பேருக்கு மின்துறையில் வேலை - அமைச்சர் நிர்மல்குமார்

தமிழ்நாடு மின்சார வாரியத்தின் 21 ஆண்டுகால வெள்ளை அறிக்கையை இன்று  காலை சென்னையில் வெளியிட்ட மின்சாரத் துறை அமைச்சர் சி.டி.ஆர். நிர்மல்குமார், வேலைவாய்ப்பிற்காகக் காத்திருக்கும் தமிழக இளைஞர்களுக்கு ஒரு மிக முக்கியப் பெருமகிழ்ச்சி அறிவிப்பை வெளியிட்டுள்ளார்.

மின்சார வாரியத்தில் நிலவி வரும் கடுமையான ஊழியர்கள் பற்றாக்குறையைப் போக்கும் வகையில், இந்த ஆண்டிற்குள்ளாகவே 20,000 புதிய பணியாளர்கள் வேலைக்குச் சேர்க்கப்படுவார்கள் என்று அமைச்சர் அறிவித்துள்ளார்.

மின்சார வாரியத்தில் நிலவி வரும் ஆள் பற்றாக்குறை மற்றும் கடந்த கால ஆட்சிகளின் அலட்சியப் போக்கு குறித்து அமைச்சர் பல்வேறு விபரங்களை அடுக்கினார். தமிழ்நாடு மின்சாரத் துறைக்கு ஒட்டுமொத்தமாக 1,40,000 பணியாளர்கள் தேவை என்ற மிக முக்கியமான சூழ்நிலை நிலவி வருகிறது. ஆனால், தற்போதைய நிலவரப்படி வெறும் 74,714 பேர் மட்டுமே பணியில் உள்ளனர். அதாவது தேவையான பணியாளர்களில் பாதி பேர் மட்டுமே கொண்டு மின்வாரியம் இயங்கி வருகிறது.

ஓய்வும் நியமனமும்: கடந்த 10 ஆண்டுகளில் மட்டும் மின்சார வாரியத்தில் இருந்து 20,240 ஊழியர்கள் தங்களின் பணிக்காலம் முடிந்து ஓய்வு பெற்றுள்ளனர். இவ்வளவு பெரிய அளவில் காலிப் பணியிடங்கள் இருந்த போதிலும், கடந்த 2021 முதல் 2026 வரையிலான 5 ஆண்டுகால முந்தைய திமுக ஆட்சியில் வெறும் 343 பேர் மட்டுமே புதிய பணியாளர்களாக வேலைக்கு அமர்த்தப்பட்டுள்ளனர் என்று அமைச்சர் நிர்மல்குமார் குற்றம் சாட்டினார்.

தற்போதைய தவெக அரசு மின்சார வாரியத்தின் சேவைகளை மேம்படுத்தவும், ஊழியர்கள் பற்றாக்குறையைத் தீர்க்கவும் போர்க்கால அடிப்படையில் நடவடிக்கை எடுத்து வருவதாக அமைச்சர் தெரிவித்தார்.  நிலுவையில் உள்ள காலிப் பணியிடங்களை நிரப்பும் பொருட்டு, நடப்பு 2026-ஆம் ஆண்டிற்குள்ளாகவே புதிதாக 20,000 பணியாளர்கள் மின்துறையில் பல்வேறு பிரிவுகளில் வேலைக்குச் சேர்க்கப்படுவார்கள்.

கடந்த 2021-2026 திமுக ஆட்சிக் காலத்தில் தேர்வு செய்யப்பட்டு, பணி நியமனம் வழங்கப்படாமல் நிறுத்தி வைக்கப்பட்டிருந்த 5,000 கேங் மேன்களும் விரைவில் முறைப்படி பணியில் அமர்த்தப்படுவார்கள்.