25 அதிமுக எம்எல்ஏக்கள் தகுதி நீக்கம்? கவிழுமா தவெக ஆட்சி?! பரபரக்கும் தமிழக அரசியல்!

தமிழக சட்டசபையில் முதலமைச்சர் விஜய் தலைமையிலான த.வெ.க அரசுக்கு ஆதரவாக வாக்களித்த அ.தி.மு.க-வின் எஸ்பி வேலுமணி தரப்பைச் சேர்ந்த 25 எம்.எல்.ஏ-க்களைத் தகுதி நீக்கம் செய்ய இ.பி.எஸ் தரப்பு தீவிர சட்ட நடவடிக்கைகளில் இறங்கியுள்ளது. இதனால் விஜய் அரசு கவிழுமா என்ற விவாதம் அரசியல் வட்டாரத்தில் எழுந்துள்ளது.

தமிழகத்தில் புதிய அரசு அமைந்ததைத் தொடர்ந்து அண்மையில் நடைபெற்ற நம்பிக்கைத் தீர்மானத்தின் போது, அ.தி.மு.க பொதுச்செயலாளர் எடப்பாடி பழனிசாமியின் (இ.பி.எஸ்) கொறடா உத்தரவை மீறி, எஸ்பி வேலுமணி, சி.வி.சண்முகம், டாக்டர் சி.விஜயபாஸ்கர் உள்ளிட்ட அ.தி.மு.க அதிருப்தி எம்.எல்.ஏ-க்கள் 25 பேர் முதலமைச்சர் விஜய்யின் த.வெ.க அரசுக்கு ஆதரவாக வாக்களித்தனர்.

கட்சியின் உத்தரவை மீறி ஆளுங்கட்சிக்கு ஆதரவாகச் செயல்பட்டதால், கட்சித் தாவல் தடைச் சட்டத்தின் கீழ் இந்த 25 எம்.எல்.ஏ-க்களும் விரைவில் தகுதி நீக்கம் செய்யப்படுவது சட்டப்படி உறுதி என இ.பி.எஸ் தரப்பு மிகத் தீவிரமாகக் கூறி வருகிறது. இதற்கான சட்ட ரீதியான மனுவைச் சபாநாயகரிடம் அளிக்க அ.தி.மு.க தலைமை முடிவு செய்துள்ளது.

ஒருவேளை இந்த 25 அ.தி.மு.க எம்.எல்.ஏ-க்களும் சபாநாயகரால் தகுதி நீக்கம் செய்யப்பட்டால் த.வெ.க அரசு கவிழுமா என்ற கேள்வி பரவலாக எழுந்துள்ளது. ஆனால், தற்போதைய சட்டமன்றப் பலத்தின்படி ஆட்சிக்கு எவ்வித ஆபத்தும் வராது என்றே புள்ளிவிவரங்கள் தெரிவிக்கின்றன.

தமிழக வெற்றிக் கழகத்தின் தற்போதைய தனிப்பட்ட பலம் 106 எம்.எல்.ஏ-க்கள் ஆகும். இவர்களுடன் த.வெ.க அரசுக்குக் காங்கிரஸ் (5), விடுதலைச் சிறுத்தைகள் கட்சி (2), மார்க்சிஸ்ட் கம்யூனிஸ்ட் (2), இந்திய கம்யூனிஸ்ட் (2) மற்றும் இந்திய யூனியன் முஸ்லிம் லீக் (2) ஆகிய கூட்டணிக் கட்சிகளின் முழுமையான ஆதரவு நீடிக்கிறது.

தற்போது அ.தி.மு.க-வின் 25 அதிருப்தி எம்.எல்.ஏ-க்களைத் தவிர்த்துப் பார்த்தாலும், த.வெ.க மற்றும் அதன் கூட்டணிக் கட்சிகளின் வசம் மட்டும் தனியாக 119 எம்.எல்.ஏ-க்களின் பலம் உறுதியாக உள்ளது.

தமிழகச் சட்டமன்றத்தில் ஆட்சி அமைக்கவோ அல்லது நீடிக்கவோ 118 எம்.எல்.ஏ-க்களின் ஆதரவு இருந்தாலே போதுமானது. எனவே, எஸ்பி வேலுமணி தரப்பு 25 எம்.எல்.ஏ-க்கள் தகுதி நீக்கம் செய்யப்பட்டாலும் அல்லது புதிய அமைச்சரவை விரிவாக்க மோதல் காரணமாக இடதுசாரிகள் மற்றும் விசிக (மொத்தம் 6 எம்.எல்.ஏ-க்கள்) தங்களின் ஆதரவை விலக்கிக் கொண்டாலும், காங்கிரஸின் 5 எம்.எல்.ஏ-க்களின் ஆதரவோடு முதலமைச்சர் விஜய் தலைமையிலான த.வெ.க அரசு 111 என்ற புதிய பெரும்பான்மை இலக்கைத் தொட்டு (மொத்த இடங்கள் குறையும் போது பெரும்பான்மைக்கான இலக்கும் குறையும்) மிகவும் ஸ்திரமாகவே நீடிக்கும் எனச் சட்ட வல்லுநர்கள் தெரிவிக்கின்றனர்.