"ரூ.10,000 மாதிரி காசோலை விநியோகம்" - 5 பேர் மீது வழக்குப்பதிவு!

தமிழக சட்டமன்றத் தேர்தல் வாக்குப் பதிவிற்கு இன்னும் 4 நாட்களே உள்ள நிலையில், சென்னை ராயபுரத்தில் அதிமுகவினர் மேற்கொண்ட ஒரு விசித்திரமான "பிரச்சாரம்" இப்போது போலீஸ் வழக்கில் முடிந்துள்ளது.

அதிமுக பொதுச்செயலாளர் எடப்பாடி பழனிசாமி, 2026 தேர்தலில் அதிமுக வெற்றி பெற்று ஆட்சிக்கு வந்தால், விலைவாசி உயர்வால் பாதிக்கப்பட்டுள்ள குடும்பங்களுக்கு ஒருமுறை நிதியுதவியாக ரூ. 10,000 வழங்கப்படும் என அதிரடி வாக்குறுதி அளித்துள்ளார். இதனை மக்களிடம் கொண்டு சேர்க்க ராயபுரம் தொகுதி அதிமுகவினர் ஒரு குறுக்கு வழியைக் கையாண்டுள்ளனர்.

ராயபுரம் பகுதியில் வீடு வீடாகச் சென்ற அதிமுகவினர், பார்ப்பதற்கு அப்படியே ஒரிஜினல் காசோலை போன்றே வடிவமைக்கப்பட்ட துண்டுப் பிரசுரங்களை விநியோகம் செய்துள்ளனர். அதில் 'ரூ. 10,000' என்ற தொகை அச்சிடப்பட்டு, அதிமுக ஆட்சிக்கு வந்தவுடன் இதனை மாற்றிக் கொள்ளலாம் என்பது போன்ற ஆசைவார்த்தைகள் இடம் பெற்றிருந்ததாகக் கூறப்படுகிறது. சில டோக்கன்களில் QR Code வசதி இருந்ததாகவும், அதை ஸ்கேன் செய்தால் அதிமுகவின் சின்னம் வருவதாகவும் புகார்கள் எழுந்தன.

இது குறித்துத் தகவல் அறிந்த பறக்கும் படையினர் மற்றும் காவல்துறையினர் சம்பவ இடத்திற்கு விரைந்து விசாரணை நடத்தினர். தேர்தல் நடத்தை விதிமுறைகளை மீறியது மற்றும் வாக்காளர்களுக்குப் பணம் தருவதாகக் கூறி ஆசைவார்த்தை காட்டி திசைதிருப்பியது.

ராயபுரத்தைச் சேர்ந்த அதிமுக நிர்வாகிகள் 5 பேர் மீது 2 வெவ்வேறு பிரிவுகளின் கீழ் காவல்துறையினர் வழக்குப் பதிவு செய்துள்ளனர். இதேபோன்ற ரூ. 10,000 டோக்கன்கள் துறைமுகம் தொகுதியிலும் அதிமுக வேட்பாளர் ராயபுரம் மனோ சார்பில் விநியோகம் செய்யப்பட்டதாகப் புகார் எழுந்து, அது தொடர்பான வழக்கு சென்னை உயர் நீதிமன்றம் வரை சென்றது குறிப்பிடத்தக்கது.

தேர்தல் வாக்குறுதிகளைத் துண்டுப் பிரசுரங்களாகக் கொடுப்பதற்கும், அதையே காசோலை அல்லது டோக்கன் வடிவில் கொடுப்பதற்கும் வித்தியாசம் இருப்பதாக நினைக்கிறீர்களா? அதிமுகவின் இந்த உத்தியை நீங்கள் எப்படிப் பார்க்கிறீர்கள்?

வாக்காளர்களுக்குப் பணம் அல்லது பரிசுப் பொருட்களை விநியோகிப்பது கடும் குற்றமாகும். இது போன்ற சட்டவிரோதச் செயல்களில் ஈடுபடும் வேட்பாளர்கள் தகுதி நீக்கம் செய்யப்படவும் வாய்ப்புள்ளது.