2 மாதங்களில் 5 ஆணவக் கொலைகள்... நெல்லை, தூத்துக்குடி, தென்காசியை 'ஆணவக் குற்ற மாவட்டங்களாக' அறிவிக்க கோரிக்கை!

தமிழகத்தில் சாதி மறுப்புத் திருமணங்கள் மற்றும் காதல் விவகாரங்கள் காரணமாக நிகழும் கௌரவக் கொலைகளின் எண்ணிக்கை சமீபகாலமாக அதிகரித்து வருவது சமூக ஆர்வலர்கள் மற்றும் பொதுமக்களிடையே பெரும் அதிர்ச்சியை ஏற்படுத்தியுள்ளது. நேற்று கூடத் தூத்துக்குடி கயத்தாறு பகுதியில் இன்ஸ்டாகிராம் காதலைக் கைவிட மறுத்த 19 வயதுக் கல்லூரிப் பெண் அடித்துக் கொலை செய்யப்பட்ட சம்பவம் பரபரப்பை ஏற்படுத்திய நிலையில், இந்த விவகாரத்தில் அரசு தலையிடக் கோரி முக்கிய அறிக்கை வெளியிடப்பட்டுள்ளது.

கடந்த 60 நாள்களில் மட்டும் தென் தமிழகத்தின் அண்டை மாவட்டங்களான திருநெல்வேலி, தூத்துக்குடி மற்றும் தென்காசி ஆகிய பகுதிகளில் அடுத்தடுத்து 5 கொடூரச் சாதி ஆணவக் கொலைகள் நிகழ்த்தப்பட்டுள்ளன. ஏற்கனவே சென்னை உயர் நீதிமன்றம் வழங்கிய வரலாற்றுச் சிறப்புமிக்க வழிகாட்டுதல்களின்படி, சாதி ரீதியிலான வன்கொடுமைகள் மற்றும் கௌரவக் கொலைகள் தொடர்ச்சியாக நடைபெறும் பகுதிகளைச் சிறப்புப் பாதுகாப்புப் மண்டலங்களாக அறிவிக்க வழிவகை உள்ளது.

ஆணவக் கொலைகளுக்கு முற்றுப்புள்ளி வைக்கத் தீண்டாமை ஒழிப்பு முன்னணி, தமிழக முதலமைச்சர் விஜய் தலைமையிலான அரசுக்கு விடுத்துள்ள அவசரக் கோரிக்கையில்,  திருநெல்வேலி, தூத்துக்குடி, தென்காசி ஆகிய மூன்று மாவட்டங்களையும் 'கௌரவம் என்ற பெயரிலான குற்ற வரலாறு கொண்ட மாவட்டங்களாக' அரசு உடனடியாகப் பட்டியலிட்டு அறிவிக்க வேண்டும்.

இந்த மாவட்டங்களில் உள்ள அனைத்துக் கிராமங்களிலும் சாதி மறுப்புத் திருமணம் செய்துகொண்ட தம்பதியர் மற்றும் காதல் ஜோடிகளுக்குப் போதிய போலீஸ் பாதுகாப்பு வழங்குவதை உறுதி செய்ய வேண்டும். உள்ளூர் உளவுத்துறை மற்றும் காவல் துறையினரை முடுக்கிவிட்டு, சாதி ரீதியான மோதல்கள் அல்லது அச்சுறுத்தல்கள் நிலவும் கிராமங்களை முன்கூட்டியே கண்டறிந்து, வன்கொடுமைத் தடுப்புச் சட்டத்தின் கீழ் கடுமையான முன்னெச்சரிக்கை நடவடிக்கைகளைத் தமிழக அரசு போர்க்கால அடிப்படையில் எடுக்க வேண்டும்.

தூத்துக்குடி பெண் கொலை வழக்கில் பெண்ணின் தாய் மற்றும் அண்ணனை கயத்தாறு போலீசார் நேற்று அதிரடியாகக் கைது செய்துள்ள சூழலில், தென் மாவட்டங்களில் சாதி ரீதியிலான சட்டம்-ஒழுங்குப் பிரச்சினைகளைக் கண்காணிக்கத் தனிப்படை போலீஸார் ரோந்துப் பணிகளில் ஈடுபட்டு வருகின்றனர்.

எனினும், தற்காலிகக் கைது நடவடிக்கைகளைத் தாண்டி, சமுதாயத்தில் நிலவும் இந்த ஆணவக் குற்றங்களைத் தடுக்கத் தமிழக அரசு நீண்டகாலச் சட்டத் தீர்வுகளையும், கடுமையான தண்டிப்பு முறைகளையும் கொண்டு வர வேண்டும் என்பதே மனித உரிமை ஆர்வலர்களின் பிரதான கோரிக்கையாக உள்ளது.