மலைப்பாதையில் சுற்றுலா வேன் கவிழ்ந்து 6 பேர் படுகாயம்!

கும்பகோணத்தில் இருந்து நீலகிரி மாவட்டம் உதகைக்கு (ஊட்டி) சுற்றுலா வந்த வேன் ஒன்று, இன்று மலைப்பாதையில் விபத்துக்குள்ளானது. சுற்றுலாப் பயணிகள் உதகையில் உள்ள பல்வேறு இடங்களைச் சுற்றிப் பார்த்துவிட்டு, பின்னர் கூடலூர் மலைப்பாதை வழியாக முதுமலை நோக்கித் தங்களது பயணத்தைத் தொடர்ந்துள்ளனர். அப்போது ஊசி மலை  அருகே வேன் வந்து கொண்டிருந்தபோது, எதிர்பாராத விதமாக ஓட்டுநரின் கட்டுப்பாட்டை இழந்த வாகனம் சாலையோர பள்ளத்தில் கவிழ்ந்து விபத்துக்குள்ளானது.

இந்த கோர விபத்தில் வேனில் பயணம் செய்தவர்களில் 6 பேர் பலத்த காயமடைந்தனர். விபத்து நடந்த சத்தம் கேட்டு அப்பகுதியில் இருந்த பொதுமக்கள் மற்றும் வாகன ஓட்டிகள் விரைந்து வந்து, வேனுக்குள் சிக்கியிருந்தவர்களை மீட்டனர். காயமடைந்தவர்கள் உடனடியாக ஆம்புலன்ஸ் மூலம் அருகில் உள்ள அரசு மருத்துவமனைக்கு சிகிச்சைக்காக அனுப்பி வைக்கப்பட்டனர். அங்கு அவர்களுக்குத் தீவிர சிகிச்சை அளிக்கப்பட்டு வருகிறது.

மலைப்பாதையில் உள்ள வளைவுகளில் வாகனத்தைச் செலுத்தும்போது ஏற்பட்ட கவனக்குறைவு அல்லது பிரேக் செயலிழந்தது விபத்துக்குக் காரணமாக இருக்கலாம் எனச் சந்தேகிக்கப்படுகிறது. இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர். கோடை விடுமுறை என்பதால் உதகைக்கு வரும் சுற்றுலாப் பயணிகளின் எண்ணிக்கை அதிகரித்துள்ள நிலையில், மலைப்பாதைகளில் வாகனங்களை இயக்கும்போது ஓட்டுநர்கள் மிகுந்த எச்சரிக்கையுடன் இருக்க வேண்டும் என மாவட்ட நிர்வாகம் அறிவுறுத்தியுள்ளது.
​