7 நாட்கள் கெடு... சமூக வலைதளக் கணக்குகள் முடக்கம்... ‘மெட்டா’ அலுவலகங்களில் காங்கிரஸார் போராட்டம்!
இந்திய இளைஞர் காங்கிரஸ் தலைவர்களின் இன்ஸ்டாகிராம் கணக்குகளை ‘மெட்டா’ நிறுவனம் முடக்கியதைக் கண்டித்து, ஹைதராபாத் மற்றும் மும்பை உள்ளிட்ட நகரங்களில் உள்ள மெட்டா அலுவலகங்களில் அக்கட்சியினர் தீவிரப் போராட்டத்தில் ஈடுபட்டனர். பாஜக மற்றும் ஆர்.எஸ்.எஸ். அமைப்புகளுக்கு ஆதரவாகச் செயல்பட்டு எதிர்க்கட்சிகளின் குரல்களை மெட்டா நசுக்குவதாகக் குற்றம்சாட்டியுள்ள காங்கிரஸ், கடந்த 6 மாதங்களில் அரசு உத்தரவின் பேரில் முடக்கப்பட்ட கணக்குகளின் விவரங்களை வெளியிட வேண்டும் என வலியுறுத்தியுள்ளது.
இந்திய இளைஞர் காங்கிரஸ் தேசியத் தலைவர் உதய் பானு சிப் மற்றும் தேசியப் பொறுப்பாளர் மணீஷ் சர்மா ஆகியோரின் இன்ஸ்டாகிராம் கணக்குகளை மெட்டா நிறுவனம் திடீரென முடக்கியதைத் தொடர்ந்து இந்தச் சர்ச்சை வெடித்துள்ளது.
இதனைக் கண்டித்துத் தெலங்கானா இளைஞர் காங்கிரஸ் தலைவர் ஜக்கிடி சிவசரண் ரெட்டி தலைமையில் ஹைதராபாத் கச்சிபௌலியில் உள்ள மெட்டா அலுவலக வளாகத்திற்குள் புகுந்த தொண்டர்கள் கண்டன முழக்கங்களை எழுப்பினர். இதேபோல் மும்பை பாந்த்ரா-குர்லா காம்ப்ளக்ஸ் பகுதியில் உள்ள மெட்டா அலுவலகம் முன்பும், குருகிராம் அலுவலகம் முன்பும் இளைஞர் காங்கிரஸார் போராட்டத்தில் ஈடுபட்டனர்.

ஹைதராபாத் போராட்டத்தின்போது முன்னெச்சரிக்கை நடவடிக்கையாக சுமார் 20-க்கும் மேற்பட்டோரைக் காவல்துறையினர் கைது செய்து பின்னர் விடுவித்தனர். மும்பை அலுவலகக் கண்ணாடியில் வாசகங்கள் எழுதி சேதப்படுத்தியதாகவும், சுவரொட்டிகளை எரித்ததாகவும் கூறி மும்பை போலீசார் 4 இளைஞர் காங்கிரஸ் நிர்வாகிகள் உள்ளிட்டோர் மீது வழக்குப் பதிவு செய்துள்ளனர்.
பாஜக மற்றும் ஆர்.எஸ்.எஸ். அமைப்புகளின் அழுத்தத்திற்குப் பணிந்து, எதிர்க்கட்சித் தலைவர்கள், பத்திரிகையாளர்கள் மற்றும் சமூக ஆர்வலர்களின் குரல்களை மெட்டா நிறுவனம் திட்டமிட்டு நசுக்குவதாக இளைஞர் காங்கிரஸ் குற்றம்சாட்டியுள்ளது.
கடந்த 6 மாதங்களில் மத்திய அரசின் உத்தரவின் பேரில் இந்தியாவில் முடக்கப்பட்ட சமூக வலைதளக் கணக்குகள் எத்தனை மற்றும் தற்போது கட்டுப்பாட்டில் உள்ள கணக்குகள் எத்தனை என்ற முழு விவரங்களையும் மெட்டா வெளியிட வேண்டும் எனக் காங்கிரஸ் கோரிக்கை விடுத்துள்ளது.
7 நாட்கள் கெடு: போராட்டத்தைத் தொடர்ந்து தலைவர்களின் இரண்டு கணக்குகள் மீண்டும் செயல்பாட்டிற்கு வந்த போதிலும், முடக்கப்பட்ட மற்ற அனைத்து எதிர்க்கட்சியினர் மற்றும் பத்திரிகையாளர்களின் கணக்குகளையும் 7 நாட்களுக்குள் மீட்டெடுக்க வேண்டும் எனவும், தவறினால் நாடு தழுவிய அளவில் மெட்டா அலுவலகங்கள் முன்பு தீவிரப் போராட்டம் நடத்தப்படும் எனவும் இளைஞர் காங்கிரஸ் எச்சரிக்கை விடுத்துள்ளது.
இளைஞர் காங்கிரஸின் இந்தப் போராட்டத்திற்குப் பாஜக மற்றும் பிஆர்எஸ் உள்ளிட்ட கட்சிகள் கண்டனம் தெரிவித்துள்ளன. தனியார் நிறுவன அலுவலகங்களுக்குள் புகுந்து அத்துமீறுவது ஏற்புடையதல்ல எனப் பாஜக செய்தித் தொடர்பாளர் பிரதீப் பண்டாரி விமர்சித்துள்ள நிலையில், இது ஹைதராபாத்தின் முதலீட்டுச் சூழலைப் பாதிக்கும் என பிஆர்எஸ் தலைவர் கே.டி. ராமராவ் கருத்து தெரிவித்துள்ளார். மறுபுறம், உள்ளூர் சட்ட விதிகளுக்கு உட்பட்டே உள்ளடக்கங்கள் கட்டுப்படுத்தப்படுவதாக மெட்டா தரப்பில் ஏற்கெனவே விளக்கமளிக்கப்பட்டுள்ளது.
