PF சந்தாதாரர்களுக்கு 8.25% வட்டி விகிதம்... மத்திய அரசு அறிவிப்பு - ஜூலை 15-க்குள் வரவு!

தொழிலாளர் வருங்கால வைப்பு நிதி அமைப்பின் சந்தாதாரர்களுக்கு மகிழ்ச்சிகரமான செய்தியாக, 2025-26 நிதியாண்டுக்கான வருங்கால வைப்பு நிதி மீதான வட்டி விகிதம் 8.25 சதவீதமாக நிர்ணயிக்கப்பட்டு, அது ஜூலை 15-ஆம் தேதிக்குள் சந்தாதாரர்களின் கணக்குகளில் வரவு வைக்கப்பட உள்ளது.

மத்திய தொழிலாளர் மற்றும் வேலைவாய்ப்பு அமைச்சகத்தின் கீழ் இயங்கும் EPFO-வின் உயர்நிலைக் குழுவான மத்திய அறங்காவலர் குழு, இந்த 8.25 சதவீத வட்டி விகிதத்தை ஏற்கனவே பரிந்துரைத்திருந்தது. இதற்கு மத்திய நிதியமைச்சகம் அதிகாரப்பூர்வமாக ஒப்புதல் அளித்துள்ளதைத் தொடர்ந்து, இந்த வட்டித் தொகையைச் சந்தாதாரர்களின் கணக்குகளில் சேர்க்கும் பணி தொடங்கியுள்ளது.

நாடு முழுவதும் உள்ள சுமார் 8 கோடிக்கும் அதிகமான சந்தாதாரர்களின் 34 கோடிக்கும் மேலான கணக்குகளில் இந்த வட்டித் தொகை வரவு வைக்கப்பட உள்ளது. EPFO-வின் புதிய மையப்படுத்தப்பட்ட தகவல் தொழில்நுட்ப அமைப்பின் மூலம், இந்த ஆண்டு வட்டி வரவு வைக்கப்படும் செயல்முறை மிகவும் வேகப்படுத்தப்பட்டுள்ளது. வழக்கமாக வட்டி வரவு வைக்கப்படும் காலத்தை விட இந்த முறை முன்பாகவே இந்தப் பணி நிறைவடையும் என்று எதிர்பார்க்கப்படுகிறது.

இந்த ஆண்டு EPFO தனது டிஜிட்டல் கட்டமைப்பில் பெரிய மாற்றங்களைக் கொண்டு வந்துள்ளதால், சந்தாதாரர்கள் தங்கள் பி.எஃப் கணக்குகளில் வட்டி வரவு வைக்கப்படுவதை எளிதாகப் பார்க்க முடியும். உதாரணமாக, ஒரு சந்தாதாரரின் கணக்கில் 1 லட்சம் ரூபாய் இருப்பு இருந்தால், இந்த 8.25 சதவீத வட்டி விகிதத்தின்படி அவருக்குச் சுமார் 8,250 ரூபாய் வட்டியாகக் கிடைக்கும்.

இந்தத் திட்டமானது தொழிலாளர்களின் நீண்டகால ஓய்வுக்காலச் சேமிப்பிற்குப் பாதுகாப்பையும், நிலையான வருமானத்தையும் உறுதி செய்வதாக அமைகிறது. சந்தாதாரர்கள் தங்களது பி.எஃப் கணக்கின் தற்போதைய நிலவரத்தை EPFO-வின் அதிகாரப்பூர்வ இணையதளம் அல்லது 'உமங்' செயலி மூலம் சரிபார்த்துக் கொள்ளலாம்.