மாண்டஸ் புயலினால் உயிரிழந்தவர்களின் குடும்பத்தினருக்கு நிவாரணம்!! அமைச்சர் அறிவிப்பு!!

மாண்டஸ் புயல், மழையின் விளைவாக உயிரிழந்தவர்கள் குடும்பத்திற்கு தலா 4 லட்சம் ரூபாய் இழப்பீடு வழங்கப்படும்  என்று அமைச்சர் கே.எஸ்.எஸ்.ஆர். ராமச்சந்திரன் அறிவித்துள்ளார். சென்னை எழிலகத்தில் உள்ள மாநில பேரிடர் கட்டுப்பாட்டு மையத்தில் அமைச்சர் கே.எஸ்.எஸ்.ஆர். ராமச்சந்திரன் ஆய்வு மேற்கொண்டார்.

பின்னர்    செய்தியாளர்களை சந்தித்தார். அப்போது அவர் பேசியதாவது, மாண்டஸ் புயலினால் 5 பேர் உயிரிழந்ததோடு, 98 கால்நடைகளும் உயிரிழந்துள்ளது. அதன் பிறகு 138 குடிசைகள் மற்றும் 18 வீடுகள் பகுதி அளவிலும், 25 குடிசைகள் முழுமையாகவும் சேதம் அடைந்துள்ளது. இதனையடுத்து 40 விசைப்படகுகள் மற்றும் 24 படகுகள்,‌ 2 பைபர் படகுகள் போன்றவைகளும் புயலினால் சேதம் அடைந்துள்ளது.

இந்நிலையில் புயலினால் உயிர் இழந்தவர்களின் குடும்பத்திற்கு 4 லட்ச ரூபாய் இழப்பீடு வழங்குவதோடு சேதமடைந்த வீடுகள் மற்றும் படகுகளுக்கும் முதல்வரின் ஆலோசனைப்படி நிவாரணம் வழங்கப்படும் என்று கூறினார்.  இந்த இழப்பீட்டு தொகையை அதிகரித்து அளிப்பது குறித்து முதல்வர் ஸ்டாலின் முடிவெடுப்பார் என்றும் அமைச்சர் கே.கே.எஸ்.எஸ்.ஆர். ராமச்சந்திரன் கூறினார்.