தண்டவாளத்தில் பழுதாகி நின்ற அரசு பேருந்து - ஓட்டுநரின் சாதுரியத்தால் பெரு விபத்து தவிர்ப்பு!

விழுப்புரம் மாவட்டம் உளுந்தூர்பேட்டை அருகே ரயில்வே தண்டவாளத்தில் பழுதாகி நின்ற அரசு பேருந்து, ஓட்டுநரின் துரித நடவடிக்கையால் பெரும் விபத்தில் இருந்து தப்பியது.

விழுப்புரம் மாவட்டம் உளுந்தூர்பேட்டை பகுதியில் பயணிகளுடன் சென்ற அரசு பேருந்து ஒன்று, அப்பகுதியில் உள்ள ரயில்வே கேட்டை கடக்க முயன்றபோது எதிர்பாராத விதமாகத் தண்டவாளத்தின் நடுவே திடீரென பழுதாகி நின்றது. ஓட்டுநர் எவ்வளவோ முயன்றும் பேருந்தை இயக்க முடியவில்லை.

அதே சமயத்தில், அதே தண்டவாளத்தில் கொல்லம் எக்ஸ்பிரஸ் ரயில் வரும் நேரமாக இருந்ததால், தூரத்திலிருந்து ரயிலின் ஹாரன் சத்தம் கேட்கத் தொடங்கியது. இதைக் கண்ட ரயில்வே கேட் கீப்பர் உடனடியாகப் பேருந்தை அப்புறப்படுத்துமாறு சத்தமிட்டுக் எச்சரித்தார்.

ரயில் நெருங்கி வருவதை உணர்ந்து அதிர்ச்சியடைந்த பயணிகள் அனைவரும் அவசர அவசரமாகப் பேருந்திலிருந்து கீழே இறங்கி ஓடினர். இதனால் அப்பகுதியில் பெரும் பதற்றமும் குழப்பமும் நிலவியது.

ரயில் வருவதற்குச் சில நொடிகள் மட்டுமே இருந்த அந்த இக்கட்டான சூழ்நிலையில், ஓட்டுநர் தனது முழுச் சாதுரியத்தையும் பயன்படுத்தி உடனடியாகப் பேருந்தை ஸ்டார்ட் செய்தார். பின்னர் பேருந்து தண்டவாளத்திலிருந்து பாதுகாப்பாக அப்புறப்படுத்தப்பட்டது. அடுத்த சில நொடிகளிலேயே எக்ஸ்பிரஸ் ரயில் அந்தத் தண்டவாளத்தைக் கடந்து சென்றது. ஓட்டுநரின் சரியான நேரத்திலான செயலால் நூலிழையில் பெரும் உயிர்ச்சேதம் தவிர்க்கப்பட்டது.