நெகிழ்ச்சியூட்டும் சாதனை... விமானப் பணிப்பெண்ணாக வலம் வந்த 12 வயது சிறுமி!
ஆஸ்திரேலியாவைச் சேர்ந்த 12 வயது இந்திய வம்சாவளி சிறுமி த்ரிஷா செவ்வனே, தனது கடுமையான சிறுநீரகப் போராட்டத்தைக் கடந்து, விமானப் பணிப்பெண்ணாக மாறி தனது நீண்ட நாள் கனவை நனவாக்கியுள்ளார். இவரின் இந்தinspiring கதை தற்போது சமூக வலைதளங்களில் பலரின் பாராட்டுக்களைப் பெற்று வருகிறது.
ஆஸ்திரேலியாவின் விக்டோரியா மாகாணத்தைச் சேர்ந்த த்ரிஷாவுக்கு, தனது 4 வயதிலிருந்தே கடுமையான சிறுநீரகப் பாதிப்பு ஏற்பட்டுள்ளது. தனது குழந்தைப் பருவம் முழுவதையும் மருத்துவமனையிலேயே கழித்த அவருக்கு, கடந்த 2024-ம் ஆண்டு அவரது தாயார் மிஷெல் தனது ஒரு சிறுநீரகத்தை மாற்று அறுவை சிகிச்சை மூலம் தானமாக வழங்கினார்.
இந்த வெற்றிகரமான அறுவை சிகிச்சைக்குப் பிறகு முழுமையாக நலம் பெற்ற த்ரிஷாவுக்கு, விமானப் பயணங்களின்போது பணிப்பெண்களின் சேவைகளைக் கண்டு தன் ஆசை துளிர்விட்டது. தானும் ஒரு நாள் விமானப் பணிப்பெண் ஆக வேண்டும் என்ற அவரது கனவை 'மேக்-ஏ-விஷ்' அமைப்பும், காண்டாஸ் விமான நிறுவனமும் இணைந்து நிறைவேற்றின.
காண்டாஸின் சிட்னி பயிற்சி மையத்தில் த்ரிஷாவுக்கு அவசர கால பாதுகாப்பு மற்றும் சேவைப் பயிற்சிகள் வழங்கப்பட்டன. அவருக்கென பிரத்தியேகமாகத் தைக்கப்பட்ட சீருடையும் வழங்கப்பட்டது.
கடந்த மாதம் 15-ம் தேதி சிட்னியிலிருந்து அடிலெய்டு சென்ற காண்டாஸ் வணிக விமானத்தில் (QF735) அவர் பணிப்பெண்ணாகக் களமிறங்கினார். விமானத்தில் ஒலிபெருக்கி வாயிலாகப் பாதுகாப்பு அறிவிப்புகளை வெளியிட்டது, பயணிகளை வரவேற்றது மற்றும் சிற்றுண்டிகளைப் பரிமாறியது என அனைவரையும் வியக்க வைத்தார்.
முன்னணிப் பணிப்பெண் ஆஷ்லி பிஷர் வழிகாட்டியில் சிறப்பாகச் செயல்பட்ட த்ரிஷாவின் இந்த நெகிழ்ச்சியான வீடியோவை காண்டாஸ் நிறுவனம் வெளியிட, உலகெங்கிலும் உள்ள நெட்டிசன்கள் அவரது தன்னம்பிக்கையைப் பாராட்டி வருகின்றனர்.