6 மாசத்துக்கு ஃப்ரீ ... ஆதார் செயலியில் மின்னஞ்சல் புதுப்பிக்கும் புதிய வசதி ... !

இந்தியத் தனித்துவ அடையாள ஆணையம் (UIDAI) பொதுமக்களின் வசதிக்காகத் தனது அதிகாரப்பூர்வ ஆதார் செயலியில் மின்னஞ்சல் முகவரியை (Email ID) நேரடியாகச் சேர்க்கும் மற்றும் புதுப்பிக்கும் புதிய வசதியை முறைப்படி அறிமுகப்படுத்தியுள்ளது. இதன்படி பொதுமக்கள் தங்களின் மின்னஞ்சல் விபரங்களைப் புதுப்பிப்பதற்காக இனி ஆதார் மையங்களுக்கு நேரில் செல்ல வேண்டிய அவசியமில்லை என்று மத்திய மின்னணு மற்றும் தகவல் தொழில்நுட்ப அமைச்சகம் தெரிவித்துள்ளது. இந்தச் சிறப்பு வசதியானது 1 ஜூலை 2026 முதல் அடுத்த 6 மாத காலத்திற்கு முற்றிலும் இலவசமாக வழங்கப்பட உள்ளது.

இந்தத் திட்டம் தொடங்கப்பட்ட முதல் 2 நாட்களிலேயே சுமார் 2.5 லட்சத்திற்கும் அதிகமான பயனாளர்கள் தங்களின் மின்னஞ்சல் முகவரிகளை இந்தச் செயலி மூலம் வெற்றிகரமாகப் புதுப்பித்து சாதனை படைத்துள்ளனர். புதிய ஆதார் செயலியானது ஆண்ட்ராய்டு மற்றும் ஆப்பிள் ஐஓஎஸ் (iOS) ஆகிய இரண்டு மொபைல் தளங்களிலும் பதிவிறக்கம் செய்யக் கிடைக்கிறது. தங்களின் மின்னஞ்சலை ஆதாருடன் இணைப்பதன் மூலம், எதிர்காலத்தில் ஆதார் அங்கீகாரம் செய்யப்படும் போதெல்லாம் உடனுக்குடன் மின்னஞ்சல் அறிவிப்புகளைப் பெற்றுப் பாதுகாப்பை உறுதி செய்ய முடியும்.

ஸ்மார்ட்போன்கள் மூலமாகவே மொபைல் எண் மற்றும் முகவரிகளை மாற்றிக் கொள்ளும் வசதிகளையும் இந்த ஆதார் செயலி எளிய முறையில் வழங்குகிறது. இதுவரை 40 மில்லியனுக்கும் அதிகமான மக்கள் மொபைல் எண்களையும், சுமார் 1 மில்லியன் பயனாளர்கள் தங்களின் முகவரி விபரங்களையும் இந்தச் செயலி வழியே புதுப்பித்துள்ளனர். இந்த அருமையான வாய்ப்பைப் பயன்படுத்திப் பொதுமக்கள் அனைவரும் தங்களின் மின்னஞ்சல் விபரங்களை உடனடியாகப் புதுப்பித்துக் கொள்ளுமாறு இந்தியத் தனித்துவ அடையாள ஆணைய அதிகாரிகள் கேட்டுக்கொண்டுள்ளனர்.