ஆம் ஆத்மி கட்சியில் பெரும் நெருக்கடி... ராகவ் சதா உட்பட 7 எம்.பி.,க்கள் பா.ஜ.க.,வில் ஐக்கியம்!

டெல்லி அரசியலில் பெரும் பரபரப்பை ஏற்படுத்தும் வகையில், ஆம் ஆத்மி கட்சியின் முக்கியத் தூணாகக் கருதப்பட்ட ராகவ் சதா அக்கட்சியில் இருந்து விலகி பா.ஜ.க.,வில் இணைய முடிவு செய்துள்ளார். அவருடன் மாநிலங்களவையின் 3 இல் 2 பங்கு உறுப்பினர்கள், அதாவது 7 எம்.பி.,க்கள் பா.ஜ.க.,வுடன் இணையப் போவதாக அறிவித்துள்ளது அரசியல் வட்டாரத்தில் நிலநடுக்கத்தை ஏற்படுத்தியுள்ளது. கடந்த சில நாட்களாகவே கட்சித் தலைமைக்கும் இவருக்கும் இடையே புகைந்து கொண்டிருந்த மோதல், தற்போது ராகவ் சதாவின் இந்த அதிரடி முடிவின் மூலம் பகிரங்கமாக வெளிச்சத்திற்கு வந்துள்ளது. தனது 15 ஆண்டுகால உழைப்பிற்கு மதிப்பளிக்காமல் கட்சித் தலைமை ஒருதலைப்பட்சமாகச் செயல்படுவதாகவும், மக்கள் நலனை விடச் சுய நலத்திற்கே அக்கட்சி முன்னுரிமை அளிப்பதாகவும் அவர் குற்றம் சாட்டியுள்ளார்.

நரேந்திர மோடியின் தலைமையிலான மத்திய அரசின் துணிச்சலான முடிவுகளால் கவரப்பட்டு இந்த முடிவை எடுத்திருப்பதாக ராகவ் சதா செய்தியாளர் சந்திப்பில் பகிரங்கமாகத் தெரிவித்துள்ளார். ராகவ் சதாவுடன் ஹர்பஜன் சிங், சுவாதி மாலிவால், சந்தீப் பதக் உள்ளிட்ட 7 எம்.பி.,க்களும் பா.ஜ.க.,வில் இணைய உள்ளனர். இந்தத் திடீர் கட்சித் தாவலால் மாநிலங்களவையில் ஆம் ஆத்மி கட்சியின் பலம் பெருமளவில் குறையும் அபாயம் ஏற்பட்டுள்ளது. அரசியலமைப்புச் சட்டத்தின்படி 2 இல் 3 பங்கு உறுப்பினர்கள் பிரிந்து செல்வதால், அவர்கள் மீது கட்சித் தாவல் தடைச் சட்டத்தின் கீழ் நடவடிக்கை எடுக்க முடியாது என்பது குறிப்பிடத்தக்கது.

இந்த விவகாரம் குறித்துப் பேசிய ராகவ் சதா, தான் ஒரு தவறான கட்சியில் இருந்த சரியான மனிதன் என்று தன்னைத் தானே வர்ணித்துக் கொண்டுள்ளார். இந்தியாவின் வளர்ச்சிக்காகத் தன்னால் முடிந்த பங்களிப்பை இனி பா.ஜ.க.,வில் இருந்து கொண்டு செய்யப் போவதாகவும் அவர் உறுதியளித்துள்ளார். இந்த அதிரடி மாற்றத்தால் டெல்லி மற்றும் பஞ்சாப் மாநில அரசியலில் பெரும் மாற்றம் ஏற்படும் என்று எதிர்பார்க்கப்படுகிறது. வரும் நாட்களில் மேலும் சில முக்கியத் தலைவர்கள் ஆம் ஆத்மி கட்சியில் இருந்து வெளியேற வாய்ப்புள்ளதாகக் கூறப்படுவதால், அரவிந்த் கெஜ்ரிவால் தலைமையிலான அக்கட்சி தற்போது பெரும் நெருக்கடியில் சிக்கியுள்ளது.