கட்டிடத்தின் மேற்கூரை இடிந்து விழுந்து வடமாநிலத் தொழிலாளி பரிதாப பலி... 30 பேர் காயம்!

சென்னை ராமாபுரம் பகுதியில் உள்ள ஒரு தனியார் குடியிருப்பு வளாகத்தில் தற்பொழுது கட்டுமானப் பணிகள் நடைபெற்று வருகின்றன. இந்த வேலைகளில் நூற்றுக்கும் மேற்பட்ட வடமாநிலத் தொழிலாளர்கள் தினந்தோறும் ஈடுபட்டு வந்ததாகக் கூறப்படுகிறது. இந்தச் சூழ்நிலையில் அங்குள்ள ஒரு கட்டிடத்தின் தரைத்தளத்தில் தொழிலாளர்கள் வேலை செய்து கொண்டிருந்த போது, எதிர்பாராத விதமாக மேல் தளத்தின் கான்கிரீட் மேற்கூரை திடீரென இடிந்து விழுந்து விபத்துக்குள்ளானது.

இந்தக் கொடூரமான விபத்தில் இடிபாடுகளுக்குள் சிக்கி வடமாநிலத்தைச் சேர்ந்த ஒரு தொழிலாளி சம்பவ இடத்திலேயே பரிதாபமாக உயிரிழந்தார். மேலும் 30-க்கும் மேற்பட்ட தொழிலாளர்கள் கட்டிட இடிபாடுகளுக்குள் சிக்கிப் பலத்த காயமடைந்தனர். இது குறித்து தகவல் அறிந்து வந்த தீயணைப்புத் துறையினர் மற்றும் மீட்புக் குழுவினர், காயமடைந்தவர்களை மீட்டுச் சிகிச்சைக்காக அருகில் உள்ள அரசு மருத்துவமனைகளுக்கு அனுப்பி வைத்தனர்.

மருத்துவமனையில் அனுமதிக்கப்பட்டவர்களில் சிலரின் நிலைமை கவலைக்கிடமாக உள்ளதால் அவர்களுக்குத் தீவிர சிகிச்சை அளிக்கப்பட்டு வருகிறது. இந்த விபத்து நடந்த விதம் குறித்து ராமாபுரம் காவல்துறையினர் வழக்குப் பதிவு செய்து, கட்டுமான நிறுவனத்தின் அலட்சியப் போக்கு தான் இதற்குக் காரணமா என்ற கோணத்தில் தொடர்ந்து விசாரணை நடத்தி வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.