நடிகர் விஜய் மீது 5 பிரிவுகளில் வழக்குப்பதிவு... ஆம்புலன்ஸ் பாதை மறிப்பு உட்படப் பல புகார்கள்!

தமிழகச் சட்டமன்றத் தேர்தலுக்கான வேட்புமனு தாக்கல் நேற்று தொடங்கிய நிலையில், சென்னை பெரம்பூர் தொகுதியில் போட்டியிட நடிகர் விஜய் தனது வேட்புமனுவைத் தாக்கல் செய்தார். அதனைத் தொடர்ந்து அவர் மேற்கொண்ட தேர்தல் பிரசாரத்தின் போது விதிமுறைகள் மீறப்பட்டதாகப் புகார் எழுந்துள்ளது.

வேட்புமனு தாக்கலுக்குப் பிறகு, விஜய் பெரம்பூர் மற்றும் கொளத்தூர் பகுதிகளில் பிரசார வாகனத்தில் சென்று வாக்குச் சேகரிப்பில் ஈடுபட்டார். அப்போது திரண்ட ஆயிரக்கணக்கான தொண்டர்களால் அந்தப் பகுதியில் கடும் போக்குவரத்து நெரிசல் ஏற்பட்டது. இது தொடர்பாகத் தேர்தல் நிலை கண்காணிப்புக் குழு அதிகாரி அளித்த புகாரின் அடிப்படையில் பெரவள்ளூர் போலீசார் நடவடிக்கை எடுத்துள்ளனர்.

பிரசாரத்தின் போது 5 ஒலிபெருக்கிகளை பயன்படுத்த மட்டுமே அனுமதி வழங்கப்பட்டிருந்தது. ஆனால், விதிகளை மீறி 30 ஒலிபெருக்கிகளைப் பயன்படுத்திப் பொதுமக்களுக்குப் பெரும் இடையூறு ஏற்படுத்தியதாகக் குற்றம் சாட்டப்பட்டுள்ளது.

பிரசாரத்தில் குறிப்பிட்ட எண்ணிக்கையிலான நபர்கள் மட்டுமே பங்கேற்க வேண்டும் என்ற விதியை மீறி, 5,000-க்கும் மேற்பட்ட பொதுமக்களைத் திரட்டியது.

மிக முக்கியக் குற்றச்சாட்டாக, பிரசாரத்தின் போது அவசர சிகிச்சைக்காகச் சென்ற ஆம்புலன்ஸ் வாகனத்தின் பாதையை மறைத்து, வழிவிடாமல் தடுத்ததாகத் தேர்தல் அதிகாரி புகார் அளித்துள்ளார்.

முறையான திட்டமிடல் இன்றிப் பிரசாரம் செய்ததால், பெரம்பூர் மற்றும் கொளத்தூர் பகுதிகளில் பொதுமக்களின் இயல்பு வாழ்க்கை பாதிக்கப்பட்டுப் போக்குவரத்து முடங்கியது. தேர்தல் அதிகாரிகளிடம் அளித்த உறுதிமொழியை மீறிச் செயல்பட்டது.

இந்தக் குற்றச்சாட்டுகளின் அடிப்படையில், இந்தியத் தண்டனைச் சட்டத்தின் தொடர்புடைய பிரிவுகளின் கீழ் விஜய் மீது 5 பிரிவுகளில் வழக்குப்பதிவு செய்யப்பட்டுள்ளது.

கொளத்தூரில் விஜய் பிரசாரம் செய்தபோது, இளைஞர்கள் மற்றும் பெண்கள் கூட்டம் அலைமோதியது. கூட்டத்தைக் கட்டுப்படுத்த முடியாமல் சிலர் சாலைத் தடுப்புகளைத் தாண்டி குதித்ததால் பரபரப்பு ஏற்பட்டது. இதனால் பாதுகாப்பு கருதி விஜய்யின் பிரசார வாகனம் கூட்டத்தில் இருந்து 500 மீட்டர் தள்ளியே நிறுத்தப்பட்டது. இருந்தபோதிலும், இளைஞர்களின் எழுச்சிக்கு மத்தியில் விஜய் தனது முதல் தேர்தல் உரையைத் தொடங்கினார்.

சென்னையில் வேட்புமனுவைத் தாக்கல் செய்துள்ள விஜய், நாளை மறுநாள் (ஏப்ரல் 2) திருச்சி கிழக்கு தொகுதியில் தனது வேட்புமனுவைத் தாக்கல் செய்ய உள்ளார். முதற்கட்டப் பிரசாரத்திலேயே வழக்குப்பதிவு செய்யப்பட்டிருப்பது அவரது கட்சியினரிடையே அதிர்ச்சியை ஏற்படுத்தியுள்ளது.