சென்னை கமிஷனர் அலுவலகத்தில் நடிகை ஜூலி கண்ணீர் மல்கப் புகார்!

பிரபல தொலைக்காட்சி நிகழ்ச்சியான 'பிக்பாஸ்' மூலம் புகழ்பெற்ற நடிகை ஜூலி (மரியஜூலியானா), இன்று சென்னை வேப்பேரியில் உள்ள மாநகரக் காவல் ஆணையர் அலுவலகத்தில் கண்ணீர் மல்கப் புகார் மனு ஒன்றை அளித்துள்ளார். ஆளும் தமிழக வெற்றிக் கழகத்திற்கு எதிராகத் தான் பேசியதால், திட்டமிட்டுத் தன் மீது பொய்க் குற்றச்சாட்டுகள் சுமத்தப்பட்டு வருவதாக அவர் குற்றம் சாட்டியுள்ளார். 

காவல் ஆணையர் அலுவலகத்தில் புகார் அளித்த பின் செய்தியாளர்களைச் சந்தித்த நடிகை ஜூலி, அழுதபடியே தனது தரப்பு விளக்கத்தைக் கூறினார். "சமூக வலைத்தளங்களிலும் சில ஊடகங்களிலும் என் மீது ஒரு தவறான செய்தி பரப்பப்பட்டு வருகிறது. நான் ஒருவருக்குக் சிறுநீரகம் (கிட்னி) தருவதாகக் கூறி, அவரிடமிருந்து ரூ.15 லட்சம் பணத்தைப் பெற்றுக்கொண்டு ஏமாற்றிவிட்டதாகப் பச்சையான பொய்க் குற்றச்சாட்டைச் சிலர் பரப்புகிறார்கள். இந்தத் தகவலில் எள்ளளவும் உண்மையில்லை. என் பெயரைக் கெடுப்பதற்காகவே திட்டமிட்டுப் பரப்பப்படும் அபாண்டமான அவதூறு இது" என்று அவர் மறுப்புத் தெரிவித்துள்ளார்.

இந்த அவதூறுகளுக்குப் பின்னால் இருக்கும் அரசியல் பின்னணி குறித்து ஜூலி பேசுகையில், "அண்மையில் நடந்து முடிந்த சட்டமன்றத் தேர்தலின் போது, நான் தவெக-விற்கு எதிராகப் பேசினேன். அவர்களுக்கு நான் வாக்களிக்கவும் இல்லை. தவெக-விற்கு வாக்களிக்காத ஒரே காரணத்திற்காக, இப்போது ஆட்சியில் இருக்கும் அந்தப் பிரமுகர்கள் என் மீது திட்டமிட்டுத் தாக்குதல் நடத்துகிறார்கள்.

மாற்று அரசியல் பேசினால் அல்லது ஆளுங்கட்சிக்கு வாக்களிக்கவில்லை என்றால் இப்படித்தான் பழிவாங்குவார்களா? ஒரு பெண்ணை இப்படிச் சமூக வலைத்தளங்களில் அவதூறு பரப்பித் சித்திரவதை செய்வது முறையா?" என்று கண்ணீருடன் ஜூலி கேள்வியெழுப்பியுள்ளார்.

தவெக தமிழ்நாட்டில் புதிய அமைச்சரவையுடன் ஆட்சியைப் பிடித்துள்ள சூழலில், தவெக அரசு தன்னை அரசியல் ரீதியாகப் பழிவாங்குவதாக நடிகை ஜூலி காவல் ஆணையர் அலுவலகத்தில் நேரில் வந்து கண்ணீருடன் புகார் அளித்துள்ளது திரையுலகிலும் அரசியல் வட்டாரத்திலும் புதிய பரபரப்பை ஏற்படுத்தியுள்ளது. இந்த விவகாரம் தொடர்பாகத் தனிப்படை போலீசார் தற்போது விசாரணையைத் தொடங்கியுள்ளனர்.