3,700 மீட்டர் உயர மலைச்சிகரத்தில் நடிகை கயாடு லோஹர் சாகசம்!
தென்னிந்தியத் திரையுலகில் வளர்ந்து வரும் இளம் நடிகையான கயாடு லோஹர், உத்தரகண்ட் மாநிலத்தில் உள்ள புக்யால் மலையேற்றப் பாதையில் சுமார் 3,700 மீட்டர் உயரமுள்ள மலைச்சிகரத்தை அடைந்து சாகசப் பயணம் மேற்கொண்டுள்ளார். கடும் குளிரையும் பொருட்படுத்தாமல் அவர் மேற்கொண்ட இந்த மலையேற்றப் பயணத்தின் புகைப்படங்கள் சமூக வலைதளங்களில் ரசிகர்களின் கவனத்தை ஈர்த்து வைரலாகி வருகின்றன.
இயற்கை எழில் கொஞ்சும் உத்தரகண்ட் மாநிலத்தின் புக்யால் உயரமான புல்வெளி மற்றும் மலைப்பாதையில் நடிகை கயாடு லோஹர் மலையேற்றத்தில் ஈடுபட்டார். கரடுமுரடான பாதைகள் மற்றும் உறைய வைக்கும் கடும் குளிரையும் எதிர்கொண்டு, கடல் மட்டத்திலிருந்து சுமார் 3,700 மீட்டர் (சுமார் 12,139 அடி) உயரமுள்ள சிகரத்தை அவர் வெற்றிகரமாக அடைந்துள்ளார்.
பனி படர்ந்த இமயமலைச் சிகரங்கள், மேகக் கூட்டங்கள் மற்றும் ரம்மியமான இயற்கைச் சூழலின் பின்னணியில் அவர் எடுத்துக்கொண்ட புகைப்படங்களைத் தனது சமூக வலைதளப் பக்கத்தில் பகிர்ந்துள்ளார். இன்னும் பல சிகரங்களை அடைய வேண்டும்: தனது மலையேற்ற அனுபவம் குறித்து சமூக வலைதளத்தில் நெகிழ்ச்சியுடன் பதிவிட்டுள்ள கயாடு லோஹர், “இது ஒரு சிறிய தொடக்கம்தான்; இன்னும் பல சிகரங்களை அடைய வேண்டியுள்ளது. நான் எப்போதும் ஒரு மலைப் பெண்ணாகவே இருப்பேன்” எனக் குறிப்பிட்டுள்ளார்.
படப்பிடிப்புப் பணிகளுக்கு இடையே சாகசப் பயணங்களில் ஆர்வம் காட்டி வரும் கயாடு லோஹரின் இந்தத் துணிச்சலான முயற்சிக்கு ரசிகர்களும், சக திரைத்துறை நண்பர்களும் சமூக வலைதளங்களில் வாழ்த்துகளையும் பாராட்டுகளையும் தெரிவித்து வருகின்றனர்.தமிழ், மலையாளம் உள்ளிட்ட தென்னிந்திய மொழித் திரைப்படங்களில் நடித்து ரசிகர்களிடையே தனக்கெனத் தனி இடத்தைப் பிடித்துள்ள கயாடு லோஹர், தனது பயண அனுபவங்களைத் தொடர்ந்து பகிர்ந்து வருகிறார். அந்த வகையில், உத்தரகண்ட் மலைச்சிகரப் பயணப் புகைப்படங்கள் தற்போது இணையத்தில் அதிகம் பகிரப்பட்டு வருகின்றன.
