அதிமுக மகளிர் அணி நிர்வாகி சூர்யபிரபா தவெகவில் இணைந்தார்!

சென்னை புறநகர் மாவட்ட அதிமுகவில் முக்கிய நிர்வாகியாகச் செயல்பட்டு வந்த பள்ளிக்கரணை சி.ஆர். சூர்யபிரபா, தனது ஆதரவாளர்களுடன் அதிமுகவில் இருந்து விலகி, தவெகவில் இணைந்தது அரசியல் வட்டாரத்தில் கவனத்தை ஈர்த்துள்ளது. வரவிருக்கும் தேர்தலை முன்னிட்டுப் பல்வேறு கட்சிகளிலிருந்தும் மாற்றுக் கட்சியினர் தவெகவை நோக்கி நகர்ந்து வரும் சூழலில், இந்த இணைப்பு சென்னை புறநகர்ப் பகுதியில் முக்கியத்துவத்தைப் பெற்றுள்ளது.

சென்னை புறநகர் மாவட்ட அதிமுக மகளிர் அணி இணைச் செயலாளராகப் பணியாற்றி வந்த பள்ளிக்கரணை சி.ஆர். சூர்யபிரபா, தனது பகுதி ஆதரவாளர்கள் மற்றும் நிர்வாகிகளுடன் தவெகவில் அதிகாரப்பூர்வமாக இணைந்தார். சென்னை புறநகர் மாவட்டத் தவெக செயலாளரும், சோழிங்கநல்லூர் சட்டமன்ற உறுப்பினருமான இ.சி.ஆர். பி. சரவணன் முன்னிலையில் இந்த இணைப்பு நிகழ்வு நடைபெற்றது. புதிதாகக் கட்சியில் இணைந்த சூர்யபிரபா மற்றும் அவரது ஆதரவாளர்களுக்குக் கட்சியின் பொன்னாடை அணிவித்து தவெக சார்பில் உற்சாக வரவேற்பு அளிக்கப்பட்டது.

சோழிங்கநல்லூர் மற்றும் பள்ளிக்கரணை உள்ளிட்ட சென்னை புறநகர்ப் பகுதிகளில் அதிமுகவின் களப்பணியில் தீவிரமாக ஈடுபட்டு வந்த சூர்யபிரபா, தற்போது தவெகவில் இணைந்திருப்பது அப்பகுதி அதிமுக தொண்டர்களிடையே அதிர்ச்சியை ஏற்படுத்தியுள்ளது.

சட்டமன்றத் தேர்தலுக்கு முன்னதாக உள்கட்சி அமைப்புகளையும், மகளிர் அணியையும் வலுப்படுத்தும் முயற்சியில் தவெக தீவிரமாக ஈடுபட்டு வரும் நிலையில், மற்ற பிரதான கட்சிகளின் பெண் தலைவர்கள் தவெகவில் இணைவது கட்சியின் மகளிர் ஆதரவு தளத்தை மேலும் அதிகரிக்கும் எனத் தவெக நிர்வாகிகள் தெரிவிக்கின்றனர்.