விமானப் பயணிகளுக்கு அதிர்ச்சி! ஏர் இந்தியா டிக்கெட் கட்டணம் உயர்வு – புதிய கட்டண விவரம்

விமான எரிபொருள் விலை தொடர்ந்து அதிகரித்து வருவதால், ஏர் இந்தியா மற்றும் ஏர் இந்தியா எக்ஸ்பிரஸ் நிறுவனங்கள் விமான டிக்கெட்டுகளுக்கான கூடுதல் எரிபொருள் கட்டணத்தை உயர்த்தியுள்ளன. இந்தப் புதிய கட்டணங்கள் அக்டோபர் 9 முதல் மேற்கொள்ளப்படும் புதிய முன்பதிவுகளுக்குப் பொருந்தும்.

மத்திய கிழக்கில் நிலவும் போர் பதற்றம் மற்றும் சர்வதேச எரிசக்தி சந்தையில் ஏற்பட்டுள்ள மாற்றங்கள் காரணமாக விமான எரிபொருளான ஏவியேஷன் டர்பைன் ஃபியூல் (ATF) விலையில் ஏற்ற இறக்கங்கள் ஏற்பட்டுள்ளன. இதனால் விமான நிறுவனங்களின் செயல்பாட்டுச் செலவுகள் அதிகரித்துள்ளன.

ஏர் இந்தியா மற்றும் ஏர் இந்தியா எக்ஸ்பிரஸ் நிறுவனங்கள், உள்நாட்டு ஒரு வழிப் பயணங்களுக்கு பயணிக்கும் தூரத்தின் அடிப்படையில் கூடுதல் கட்டணத்தை நிர்ணயித்துள்ளன.

அதன்படி, 500 கிலோமீட்டர் வரையிலான பயணங்களுக்கு ரூ.400, 501 முதல் 1,000 கிலோமீட்டர் வரையிலான பயணங்களுக்கு ரூ.600, 1,001 முதல் 1,500 கிலோமீட்டர் வரையிலான பயணங்களுக்கு ரூ.850 கட்டணம் வசூலிக்கப்படும். 1,501 கிலோமீட்டர் மற்றும் அதற்கு மேற்பட்ட தூரப் பயணங்களுக்கு ரூ.1,200 கூடுதல் எரிபொருள் கட்டணம் விதிக்கப்படும்.

சர்வதேசப் பயணங்களுக்கான கட்டணம் செல்லும் பிராந்தியத்தைப் பொறுத்து மாறுபடும். வட அமெரிக்காவுக்குச் செல்லும் பயணங்களுக்கு 215 அமெரிக்க டாலரும், ஆஸ்திரேலியாவுக்கு 210 டாலரும், ஐரோப்பா மற்றும் இங்கிலாந்துக்கு 135 டாலரும், மேற்கு ஆசியா மற்றும் மத்திய கிழக்கு நாடுகளுக்குச் செல்லும் பயணங்களுக்கு 55 டாலரும் கூடுதல் எரிபொருள் கட்டணமாக நிர்ணயிக்கப்பட்டுள்ளது.

இதற்கிடையே, ஆகாசா ஏர் நிறுவனமும் உள்நாட்டு மற்றும் குறிப்பிட்ட சர்வதேச வழித்தடங்களில் எரிபொருள் கூடுதல் கட்டணத்தை மாற்றியுள்ளது. விமான எரிபொருள் விலை உயர்வால் ஏற்படும் செலவின் ஒரு பகுதியை ஈடுகட்டும் நோக்கில் இந்த நடவடிக்கை எடுக்கப்பட்டுள்ளதாக நிறுவனங்கள் தெரிவித்துள்ளன.

இந்தக் கட்டண மாற்றங்கள் புதிய முன்பதிவுகளுக்குப் பொருந்தும். எனவே, விமானப் பயணத்திற்கான டிக்கெட் முன்பதிவு செய்யும் பயணிகள், தங்களது பயணத் தேதி மற்றும் வழித்தடத்திற்கான இறுதிக் கட்டணத்தை சம்பந்தப்பட்ட விமான நிறுவனத்தின் இணையதளத்தில் சரிபார்த்துக்கொள்வது அவசியம்.